Nga Donat Maloku
Në Kosovë janë katër parti që dominojnë skenën politike që nga paslufta: PDK-LDK-AAK dhe Lëvizja “Vetëvendosje”. Tri të parat kanë qenë dhe janë në qeverisje, ndërsa “Vetëvendosje” ka marrë pushtetin në Prishtinë.
Ikjet e qytetarëve nga vendi në drejtim të vendeve të perëndimit kanë shkaktuar zhgënjim të madh me klasën politike në tërësi. Duke parë këtë pakënaqësi, gjithnjë e më shumë po rriten zërat se Kosova ka nevojë për një parti të re politike që seriozisht sfidon partite aktuale.
Në një të ardhme jo të largët, vendit mund t’i shtohet një subjekt i ri serioz politik, i drejtuar nga figura të jetës publike në vend, kryesisht nga shoqëria civile. Kjo, pasi klasa politike aktuale konsiderohet e shpenzuar dhe e degraduar nga qytetarët e vendit.
Ata nuk presin që partitë që përbëjnë skenën politike kosovare ta nxjerrin vendin nga kriza e thellë ekonomike, varfëria sociale dhe të ofrojnë një edukim të mirëfilltë arsimor.
Ish-deputetë të Kuvendit të Kosovës, analistë dhe njohës të së Drejtës Kushtetuese, vlerësojnë se vendit i duhet një alternative e re qeverisëse, parti e cila do të qeveriste së bashku me qytetarët e jo që pasurohet në kurriz të tyre.
Eqrem Kryeziu, ish-deputet i LDK-së në një prononcim për portalin ‘Te Sheshi’, thotë se besimi i qytetarëve tek partitë aktuale ka humbur dhe një parti e re do të ishte një alternativë e re. “I duhet një forcë e re politike, meqë besimi tek partitë ekzistuese është komprometuar keq. Natyrisht, forca eventuale e re do të ishte parodi, po qe se do të kishte ngjashmëri me “kualitetet” në qarkullim”, ka thënë Kryeziu.
Ditar Kabashi, student i masterit në të Drejtën Kushtetuese, vlerëson se duhet një alternativë me ide rrënjësisht reformatore që konteston gjithçka dhe do të dijë të ndajë shapin nga sheqeri, pa pasur kompleksin e ndërvarësisë ndaj faktorëve burokratikë apo ndaj të fuqishmëve ekonomikisht. Sipas tij vendit i duhet një subjekt që qeverisë së bashku me popullin e jo që e sundon atë.
“Megjithatë, krijimi i subjekteve nuk sjell ndonjë risi esenciale në aureolën politike dhe kjo është dëshmuar në Kosovë ndoshta si askund tjetër. Kaq pak popull e kaq shumë parti lë të kuptohet se puna nuk qëndroka te regjistrimi i partive a iniciativave. Në thelb, është varfëria e origjinalitetit të programeve, një “copy-paste” i tyre me përjashtime të rralla dhe diferencim vetëm në lartësinë e premtimeve elektorale që në fund të duket se cili na qenkësh më qesharak. Prandaj, duke e ditur se edhe në subjektet aktuale ka individë që e duan këtë vend, apo marrë parasysh edhe potencialin e konsiderueshëm të shoqërisë civile, do të ishte krucial krijimi i një elite të re, jo në kuptimin që do të sundonte popullin, por do të qeveriste bashkë me të. Kjo do të prodhonte një kulturë të re politike, të pa importuar me modele krejtësisht joautoktone, një version të qartë e konkret të një alternative politike, e cila sipas meje, do të synojë ndryshimin në mentalitet e pastaj në praktikë. Materializimi apo jo i saj në subjekt të veçantë politik do të ishte vetëm një rezultat që më tepër do të perceptohej formalisht. S’ka rëndësi emri i subjektit, qoftë i ri apo ekzistues. Bazik është ndryshimi dhe alternativa që do rizgjojë entuziazmin e zbehur të popullit dhe do të fuqizojë Republikën si vlerë të përbashkët dhe indentitet për ne”, ka deklaruar Kabashi, për portalin ‘Te Sheshi’.
Blerim Burjani, njohës i çështjeve politike në vend, thotë se Kosova është në pritje të një alternative të re politike. Ai thotë se partite aktuale në Kosovë nuk meritojnë vëmendjen e qyetetarëve të zhytur në shumë biznese e korrupsion dhe paligjshmeri . “Fitohet përshtypja se këta tallen me veten , bëjnë qef me para të popullit, zgjidhin telashe familjare, të gjithë kë e kane pru këtë gjendje. Pa një alternativë tjetër politike shteti nuk konsolidohet. Kjo klasë politike e karakterizon rivialiteti i fuqishëm politik dhe si të tillë kanë ndarë popullin në patriot dhe trathtarë në keqbërës dhe korrupsionist. Nuk hezitojnë të ulën dhe të pinë kafe së bashku dhe të ndërrrojnë fjalë sa herë e shohin të interest. Kjo klasë është komprementuar politikisht”, vlerëson Burjani.
Mediet ditëve të fundit kanë raportuar se publicisti Dukagjin Gorani bashkë me disa figura të jetës publike në vend, po e shqyrtojnë mundësinë e themelimit të një partie të re politike, duke thënë se ajo momentalisht është vetëm në nivel të takimeve dhe diskutimeve mes miqve dhe kolegëve.
Akademik Rexhep Qosja ka deklaruar kohë më pare për media se është e rëndësishme për vendin themelimi i një partie të re, me program që do të ndryshonte thelbësisht prej programeve të partive tjera.
Ndryshe, anketa të ndryshme të bërë në vend, kanë rezultuar se Kosovës i duhet një subjekt i ri politik që në fokus do të kishte mirëqenien e qytetarëve. /tesheshi.com/
