Piloti gjerman i Ferrari-t e kaloi i parë finishin në Çmimin e madh të Brazilit, gara e parafundit e një botërori pa enigma tashmë, por heroi i ditës ishte kampioni Hamilton, me një pilotim spektakolar.
Vettel u kthye te fitorja pas shumë muaj, atëherë kur ajo vlen veç për statistika. Nga fundi i korrikut, në Hungari, ai nuk do të ngjitej më në majë të podiumit, çka e pagoi me humbjen në luftën për titull. Megjithatë, gjermani tregoi se është në lartësinë e detyrës sa herë që gjërat shkojnë mirë për Ferrari-n.
Fitorja qe një ngushëllim për Vettel-in, të cilin në podium e shoqëruan Bottas e Raikkonen, të renditur në vend të dytë e të tretë.
Përndryshe, piloti më i spikatur qe Hamilton, që e nisi garën nga bokset, për ta përfunduar atë në vend të katërt, pas parakalimeve të njëpasnjëshme. Me lirshmërinë e një kampioni, ai ia doli ta zhvendosë vëmendjen nga kreu te makina e tij, e papërmbajtshme në pistën braziliane.
Emocionuese qe dhe përshëndetja e lamtumirës e Felipe Massa-s. Piloti i Williams-it dhuroi dhe një duel me Alonso-n, një rival i viteve të shkuara, atëherë kur dy pilotët ishin në shkëlqimin e tyre.
Pas Vettel-it, Bottas-it dhe Raikkonen-it, dhjetëshen e pilotëve të shpërblyer me pikë do ta plotësonin Hamilton, Verstappen, Ricciardo, Massa, Alonso, Perez dhe Hulkenberg.
Gara e fundit sezonale është ajo e Abu Dhabit, dy javë më pas. /tesheshi.com/
