Nga Blendi Gashi
Pas ndaljes së “trenit” dhe rrëzimit të “murit”, çështja e Asociacionit të komunave me shumicë serbe dhe Demarkacionit me Malin e Zi janë rikthyer si temat kyçe në politikën kosovare.
Ndërsa pushteti këmbëngul në kalimin e këtyre dy çështjeve, opozita në anën tjetër paralajmëron se do bëj ç’mos t’i ndalë ato, qoftë edhe me rikthimin e gazit dhe protestave brenda dhe jashtë Kuvendit, siç vepruan për shtatë muaj.
Dhe është “Zajednica” e para që pritet të trazojë skenën politike. Por se kur do nis themelimi i saj, këtë siç duket nuk e di as qeveria “Mustafa”, pasi zyrtarë të saj brenda një dite kanë dhënë deklarata kundërthënëse, duke shpërfaqur kështu në opinion mosdakordancën brenda ekzekutivit për çështjen në fjalë.
Bëhet fjalë për ministren për Dialog, Edita Tahiri dhe Bajram Gecaj, këshilltar i Mustafës, të cilët të mërkurën bën deklarata të ndryshme rreth çështjes se kur do themelohet Asociacioni.
Ministrja Tahiri para anëtarëve të komisionit kuvendar për punë të Jashtme tha se “Asociacioni formohet kur të shuhen të gjitha strukturat serbe në Kosovë”.
Por një qëndrim krejt tjetër e ka dhënë Gecaj. Ai në një intervistë për mediat kosovare ka thënë se fillimi i hartimit të statutit të Asociacionit, do të mundësohet pas kthimit të Listës Serbe në institucione.
“Deri tash nuk ka pasur atmosferë politike të përshtatshme që të fillojë puna. Nëse tash, pas këtyre bisedave, do të vazhdojë një frymë e tillë, e cila vërtetë ka qenë konstruktive gjatë zgjidhjes së problemit të çështjes së murit, unë besoj që ka gjasa që ne të fillojmë punën për përpilimin e statutit për Asociacionin e komunave me shumicë serbe”, deklaroi Gecaj.
Duke parë këto deklarata tejet kundërthënëse, shtrohet pyetja se cilit zyrtarë qeverie duhet besuar?
Nëse merret për bazë deklarata e ministres Tahiri se s’do ketë themelim të Asociacionit deri në zhbërjen e strukturave të mbetura ilegale në veri, i bie se jo këtë vit por edhe disa vite nuk do formohet e ashtuquajtura “Zajednicë”, pasi ilegalët vështirë se do largohen tërësisht nga ajo pjesë ku përfitojnë jo pak.
Në anën tjetër, deklarata e Gecajt jep sinjale se Asociacioni mund të themelohet shpejt, pasi që kryeministri ka paralajmëruar se deputetët e “Srpska”-s javën tjetër do kthehen në institucione. Zyrtarët e kësaj liste që njohin si kryeministër Vuçiçin e jo Mustafën, siç duket kanë marrë urdhër nga Beogradi të kthehen në Parlament, jo për të punuar për të mirën e serbëve që jetojnë në Kosovë, por pikërisht me synimin që ta themelojnë sa më parë “Zajednicën”, kërkesë tashmë kjo e njohur e tyre.
Duke parë deklaratat kundërthënëse të Tahirit e Gecajt, shtrohet pyetja nëse ata do qortohen nga kryeministri Mustafa? Apo ndoshta vet kreu i ekzekutivit në ditët në vazhdim do të tregojë më saktë se kur realisht do themelohet Asociacioni, pasi gjatë takimit që zhvilloi të martën me presidentin Thaçi e kryekuvendarin Veseli u pajtuan që një gjë e tillë të ndodh sa më parë, por që nuk dhanë një datë.
Ndryshe, Gjykata Kushtetuese më 23 dhjetor të 2015-tës, bëri të ditur se disa pjesë të marrëveshjes për krijimin e Asociacionit nuk janë në pajtim me Kushtetutën, dhe sqaroi se duhet të themelohet ashtu siç është parashikuar në marrëveshjen e parë të nënshkruar ndërmjet Kosovës dhe Serbisë më 19 prill të vitit 2013, marrëveshje kjo që shënoi fillimin e normalizimit të marrëdhënieve ndërmjet dy vendeve. /tesheshi.com/
