Në memon e Pentagonit që përvijon “prioritetet kryesore të mbrojtjes” për administratën e re Trump, identifikohen si të tilla mposhtja e ISIS, eleminimi i problemeve me buxhetin, zhvillimin e një strategjie të re kibernetike dhe efikasitet më të madh. Por, në këtë memo, të publikuar nga “Foreign Policy” nuk përmendet fare Rusia, e cila ishte identifikuar nga zyrtarë të lartë ushtarakë si kërcënimi numër 1 për Shtetet e Bashkuara.
“Njerëzit duhet të jenë mjaft të shqetësuar kur të shohin se Rusia nuk është në listë”, tha Evelyn Farkas, ish-zyrtare e lartë e Pentagonit që ka punuar për politikat ndaj Rusisë përpara se të linte detyrën në vitin 2015.
Për vite me radhë, zyrtarët më të lartë të departamentit të Mbrojtjes dhe komunitetit të shërbimeve sekrete kanë cituar Rusinë si kërcënimin më madhor për shkak të arsenalit të saj të jashtëzakonshëm bërthamor, aftësive të sofistikuara kibernetike, së fundmi edhe për ushtrinë e modernizuar dhe vullnetin që shfaq në sfidat ndaj Shteteve të Bashkuara dhe aleatëve të tyre në Lindjen e Mesme, Europën Lindore dhe rajone të tjera.
Gjenerali Joseph Dunford, kreu i Shtabit të Përgjithshëm të stafeve që do të qëndrojë në këtë detyrë edhe pasi Trump të marrë postin më 20 janar, i tha Kongresit vitin e kaluar se nuk ka kërcënim tjetër më serioz sesa Rusia.
“Nëse dëshironi të flisni për një komb që mund të përbëjë kërcënim ekzistencial për Shtetet e Bashkuara, më duhet të drejtoj gishtin tek Rusia”, tha Dunford përpara Komitetit të Marrëdhënieve me Jashtë të Senatit. “Nëse shihni sjelljet e tyre, mund të alarmoheni”. Ai listoi Kinën, Korenë e Veriut dhe ISIS si kërcënime të tjera, sipas kësaj renditjeje.
Memoja që daton në 1 dhjetor, është shkruar nga N/Sekretari në detyrë i Mbrojtjes për Politikën, Brian McKeon. Në të, ai thotë se lista me katër prioritete iu përcoll atij nga Mira Ricardel, ish-zyrtare e administratës Bush dhe bashkëdrejtuese e ekipit të tranzicionit të presidentit të zgjedhur Trump, për Pentagonin.
Përveçse vendos theksin në çështje buxhetore, “rritjen e forcës” dhe kundër-terrorizmin në Irak dhe në Siri, memoja vë në dukje përmbledhjet midis Departamentit të Mbrojtjes dhe ekipit Trump të tranzicionit për Kinën dhe Korenë e Veriut, por nuk përmendet fare Rusia.
Një zyrtar i ekipit të tranzicionit Trump refuzoi të deklarojë se ku qëndron Rusia në prioritetet e mbrojtjes të presidentit të zgjedhur, por ai tha se memoja “nuk është e plotë”.
“Që media të spekulojë që kjo listë me çështje përfaqëson të gjitha prioritetet e presidentit të zgjedhur është tërësisht gabim dhe ç’orientuese.
Një zëdhënës i Pentagonit refuzojë të komentojë prioritetet e administratës së ardhshme, por tha se ekipi i tranzicionit është informuar në lidhje me çështjet që kanë të bëjnë me Rusinë.
Që nga nisja e fushatës, Trump ka argumentuar hapur se marrëdhëniet e përmirësuara me Rusinë janë në interes të Shteteve të Bashkuara, sidomos në lidhje me kundër-terrorizmin në Irak dhe në Siri.
Javën e kaluar, ai caktoi shefin e ExxonMobil, Rex Tillerson si Sekretar Shteti duke argumentuar se biznesi i madh i naftës që ai bën me Rusinë do të ishte një aset kryesor në negociatat ndërkombëtare.
Nën drejtimin e Tillerson, Exxon ka lobuar kundër sanksioneve amerikane të vendosura ndaj Moskës për aneksimin e Krimesë në vitin 2014. Gjigandi i naftës do të përfitonte nga marrëveshjet me Rusinë me miliardë dollarë, nëse do të hiqeshin sanksionet.
Mesazhet e Trump gjatë gjithë fushatës përmirësuan dukshëm qëndrimin e GOP ndaj Rusisë, sipas sondazheve të fundit. Por, mjedisi i politikës së Jashtme në SHBA, përfshirë pjesë të rëndësishme të Pentagonit, Departamentit të Shtetit dhe CIA-s, mbeten thellësisht skeptikë për Moskën.
Ka të tjerë që thonë se është shpejt për të gjykuar qëndrimin që Pentagoni i Trump do të marrë ndaj Rusisë, pasi gjenerali James Mattis, i piketuar si Sekretar i Mbrojtjes, ende nuk është konfirmuar.
Zyrtarët thonë, se gjithsesi, nëse prioritetet e administratës Trump do të mbeten ato në listë, edhe pas marrjes së detyrës, ato do të ndeshin në një rezistencë të fortë. Së pari nga shefi i shtabeve, që ka edhe gjashtë muaj mandat në këtë detyrë dhe që mendon se Rusia përbën rrezikun numër një.
Përgatiti: Juli Prifti – /tesheshi.com/
