Një operacion i forcave të armatosura turke dhe i forcave ajrore të koalicionit ndërkombëtar të udhëhequr nga SHBA-të ka nisur në orët e para të mëngjesit të së mërkurës për ta larguar ISIS-in nga Xherablusi në Siri.
Operacioni që nisi rreth orës katër të mëngjesit u shoqërua nga bombardime të shumta të artilerisë turke brenda dy orëve, duke goditur 63 objektiva. Avionët luftarakë turq dhe të koalicionit i bombarduan po ashtu objektivat e ISIS-t në Xherablus.
Sipas burimeve ushtarake turke, nga operacionet ajrore janë shkatërruar 12 objektiva.
Kjo ishte hera e parë që avionët turq F-16 kryen operacione në veri të Sirisë që prej rrëzimit të avionit rus nëntorin e vitit të kaluar.
Raportohet në të njëjtën kohë se forcat speciale turke kanë hyrë nga toka në Xherablus, edhe pse burime të pakonfirmuara mohojnë që të ketë nisur një ofensivë tokësore.
Operacioni synon ta spastrojë kufirin turk nga grupet terroriste, duke rritur sigurinë kufitare, në mbështetje të integritetit territorial të Sirisë. Ky operacion është dhe një përgjigje ndaj raketave të hedhura në zonat e banuara turke nga ana siriane e kufirit. /tesheshi.com/
