Departamenti i Policisë së Dallasit ka përdorur për herë të parë një robot të ngarkuar me një mjet shpërthyes për të likuiduar vrasësin e dyshuar, bënë me dije të premten autoritetet e qytetit.
I dyshuari thuhet se ka vrarë pesë punonjës policie dhe ka plagosur disa tjerë mbrëmjen e së enjtes, gjatë një proteste të mbajtur në qendër të qytetit kundër brutalitetit të shfaqur nga ana e policisë.
Shefi i policisë, David Brown, ka zbuluar gjatë një konference për shtyp të mbajtur të premten se policia e ka vrarë Micah Xavier Johnson-in duke përdorur një robot të pajisur me mjetin shpërthyes.
Ekspertët e sigurisë thonë se besohet që kjo është hera e parë që forcat policore kanë përdorur një robot për neutralizimin vdekjeprurës të një të dyshuari.
“Nuk kemi parë zgjidhje tjetër, veçse të përdorim robotin tonë dhe të vendosim mjetin shpërthyes, të cilin e kemi detonuar në vendin ku po qëndronte i dyshuari,” ka deklaruar Brown.
Autoritetet kishin vendosur që ta përdornin robotin ngase, siç thonë ata, “Johnson-i po i mbante aktivisht në shënjestër zyrtarët policorë.”
“Alternativat e tjera do t’i ekspozonin zyrtarët tanë ndaj një rreziku të madh,” ka thënë Brown. “I dyshuari ka vdekur si rezultat i detonimit të mjetit shpërthyes.”
Përndryshe, pajisja e përdorur është një robot që aktivizohet përmes teledirigjuesit.
Forcat e policisë në të gjithë vendin i kanë përdorur robotët për të vendosur gaz lotsjellës dhe mjete të tjera jovdekjeprurëse, por të enjten mbrëma ka ndodhur për herë të parë që një departament policie ta përdorë një të tillë për vrasjen e një të dyshuari. /tesheshi.com/
