Katër persona janë vrarë nga forcat izraelite të sigurisë në Bregun Perëndimor dhe në Jerusalemin Lindor prej orëve të vona të së enjtes e gjer këtë të premte.
Në një incident në orët e mbrëmjes së të enjtes, fıorcat izraelite kanë qëlluar një palestinez gjatë një bastisjeje në fshatin Bejt Ula, në Hebron. Palestinezi i plagosur ka ndërruar më pas jetë nga plagët e marra.
Ndërsa këtë të premte, policia izraelite qëlloi për vdekje fillimisht një person që u pretendua se po përpiqej t’i godiste me thikë ushtarët izraelitë. Ngjarja ndodhi në hyrjen e Portës së Damaskut, në qytetin e vjetër të Jerusalemit Lindor, dhe viktima, një 28-vjeçar, posedonte një kartë identiteti jordaneze.
Një tjetër incident ngjau pranë një ngulimi izraelit në Hebron. Një njoftim i ushtrisë izraelite bënte me dije se një çift palestinez e përplasi makinën në një stacion autobusi. Forcat e sigurisë në vendngjarje qëlluan mbi makinën, duke vrarë palestinezin në timon dhe duke plagosur bashkëshoqëruesen e tij.
Një palestinez gjithashtu u vra po sot në lagjen Tel Rumejda të Hebronit, në Bregun Perëndimor. Forcat izraelite do ta qëllonin atë teksa, siç thuhet, ai po kërkonte të sulmonte me thikë një ushtar.
Më së paku 225 palestinezë janë vrarë në territoret e pushtuara palestineze që nga tetori i vitit të shkuar prej forcave izraelite dhe kolonëve. /tesheshi.com/
