Me dhjetëra palestinezë u plagosën pasi forcat izraelite të sigurisë sulmuan besimtarët muslimanë brenda rrethimit të xhamisë al-Aqsa në Jeruzalemin Lindor. “Të paktën 170 forca speciale izraelite dhe policë sulmuan duke hyrë nga porta Al-Magharabeh dhe nisën të qëllojnë me plumba plastikë e granata shurdhuese”, tha sheiku Azzam al-Khatib, drejtori i përgjithshëm për xhaminë.
Ai shtoi se një i moshuar palestinez u dërgua në spital në gjendje kritike. Forcat izraelite sulmuan edhe xhaminë Al-Qibali, besimtarët që ndodheshin aty dhe arrestuan shtatë persona.
Ekstremistët izraelitë kanë bërë thirrje për sulme ndaj xhamisë Al-Aqsa gjatë vitit të ri hebraik. Për muslimanët, kompleksi i xhamisë Al-Aqsa përfaqëson vendin e tretë më të shenjtë, ndërsa izraelitët, nga ana e tyre, i referohen zonës si “mali Tempull”, duke pretenduar se aty kanë qenë dy tempuj hebrenj në kohët e lashta.
Izraeli e pushtoi Jeruzalemin Lindor gjatë luftës së 1967 në Lindjen e Mesme. Më pas, aneksoi qytetin në vitin 1980, duke e cilësuar atë kryeqytet të shtetit hebraik, një lëvizje kjo që nuk njihet nga komuniteti ndërkombëtar.
Në shtator 2014, vizita e politikanit kontrovers izraelit, Ariel Sharon në Al-Aqsa nxiti atë që më vonë u njoh si “Intifada e Dytë”, një kryengritje popullore kundër pushtimit izraelit gjatë së cilës u vranë me qindra palestinezë. /tesheshi.com/
