Ushtria irakiane njoftoi të dielën se ka shtënë në dorë një kompleks qeveritar në Ramadi, e se u ka shkaktuar dëme të konsiderueshme forcave të ISIS-it.
Burimet nga terreni bëjnë të ditura se forcat irakiane kontrollojnë tani 60 për qind të qytetit, ndërsa luftëtarët e ISIS-it po bëjnë ende rezistencë.
Një zëdhënës i trupave qeveritare do ta përshkruante kështu marrjen e kompleksit, të parë si një pikë strategjike në betejën për kryeqendrën e provincës së Anbarit, “Marrja në kontroll e kompleksit do të thotë se ne i kemi mundur ata në Ramadi.”
Lufta për marrjen e qytetit nisi të enjten, pasi ai gjendej prej majit të këtij viti në duart e ISIS-it. Largimi i plotë i luftëtarëve të ISIS-it dhe çlirimi tërësor i qytetit do të ishte një fitore e rëndësishme për forcat irakiane, që po përpiqen të marrin nën kontroll territorin e vendit. /tesheshi.com/
