Forcat irakiane të sigurisë kanë nisur një operacion të madh në rajonin e Kirkukut, i cili po mbahet nga kurdët dhe po përparojnë drejt fushave të naftës dhe bazave strategjike ushtarake, njoftuan zyrtarët kurdë dhe irakianë.
Qëllimi i operacionit është rimarrja e kontrollit mbi bazën ajrore K1, në perëndim të Kirkukut, tha lejtnant Salah el-Kinani nga ushtria irakiane, raporton Reuters.
Forcat irakiane hynë në pjesë të zonave rurale jashtë qytetit të Kirkukut dhe morën kontrollin e “një zone të madhe” pa asnjë rezistencë nga forcat kurde të peshmergave, njoftoi televizioni shtetëror iraken.
Megjithatë, një zyrtar kurd për siguri mohoi se forcat irakiane kanë arritur t’i afrohen qytetit ose të rimarrin zonën Peshmergi, duke u thënë për Reuters se fushat e naftës dhe baza ajrore ishin ende nën kontrollin kurd.
“Ata sulmuan Peshmergët nga dy fronte, në kryqëzimin Taza-Kirkuk dhe në urën e Bagdadit të Merjemes në jug të Kirkukut, duke përdorur pajisje ushtarake të SHBA”, u tha në një deklaratë të Këshillit Rajonal të Sigurisë të Kurdistanit.
Forcat kurde pohojnë se kanë shkatërruar së paku pesë automjete ushtarake amerikane të përdorura nga ushtria irakiane.
“Peshmerget do të vazhdojnë të mbrojnë Kurdistanin, njerëzit dhe interesat e saj. Ky ishte një sulm që nuk u provokua, i cili ndodhi pasi forcat irakiane u angazhuan në kufirin e Kurdistanit”, thuhet në deklaratë.
Televizioni shtetëror i Irakut njoftoi se kryeministri Heider al-Abadi lëshoi urdhër për “vendosjen e sigurisë në Kirkuk në bashkëpunim me banorët dhe peshmergat”.
Peshmergët morrën nën kontroll rajonin e Kirkukut pasi ushtria irakiane u arratis gjatë ofensivës së madhe të ISIS-it në vitin 2014.
Që atëherë nuk ka pasur asnjë marrëveshje midis qeverisë rajonale kurde dhe qeverisë federale në Bagdad, se kush do të duhet të kontrollojë atë zonë dhe të mbledhë të ardhurat nga fushat e naftës.
Tensionet midis qeverive qendrore dhe rajonale janë rritur për shkak të referendumit të muajit të kaluar mbi pavarësinë kurde. /tesheshi.com/
