Sipas aktivistëve në terren, forcat qeveritare siriane kanë hedhur me helikopterë dy bomba fuçi me gaz klori në një lagje të Halepit.
Mbrojtja Civile Siriane njoftoi për hedhjen e bombave fuçi me klor mbi Sukkari, lagjen në veri të Halepit, duke shtuar se 80 persona janë asfiksuar, por nuk foli për të vdekur.
Observatori Sirian për të Drejtat e Njeriut raportoi për 70 persona të asfiksuar në Sukkari pas sulmit nga ajri prej forcave të regjimit.
Ndërkohë, sipas Al Jazeera-s, aktivistët flasin për një të vdekur dhe 100 të plagosur prej dy bombave fuçi të mbushura me gaz që u hodhën mbi banorët e Halepit.
Mbrojtja Civile Siriane e pati akuzuar dhe në gusht qeverinë për dy sulme të tjera me gaz klori. OKB-ja lajmëroi për hetimin e këtij pretendimi.
Qeveria siriane i ka mohuar akuzat e mëhershme për përdorim të armëve kimike gjatë konfliktit të armatosur në vend.
Një hetim muajin e shkuar nga OKB-ja dhe nga Organizata për Ndalimin e Armëve Kimike nxori se forcat qeveritare siriane ishin përgjegjëse për dy sulme me gaz toksik gjatë dy viteve të shkuara, duke përfshirë dhe përdorimin e klorit. /tesheshi.com/
