Ka filluar këtë të dielë evakuimi i kryengritësve dhe banorëve nga Kabuni, një lagje e kryeqytetit sirian, ndërsa ushtria e Esadit përparon në marrjen tërësisht nën kontroll të Damaskut.
Një korrespondent i AFP-së ka parë dhjetë autobusë me kryengritës dhe banorë këtë mëngjes, vetëm pak orë pas marrëveshjes të evakuimit të arritur pas luftimeve të ashpra.
Një marrëveshje e arritur mes forcave qeveritare siriane dhe grupeve të armatosura siriane, që parashikon një evakuim drejt Idlibit të civilëve dhe kryengritësve.
Observatori Sirian për të Drejtat e Njeriut thotë se forcat e Beshar Esadit kanë marrë pjesën më të madhe të lagjes, me vetëm 20 për qind të saj në duart e kryengritësve.
Marrëveshja vjen vetëm dy ditë pasi një numër i madh kryengritësish dhe i familjeve të tyre u larguan nga një rrethinë e rrethuar e Damaskut. 700 persona janë larguar vetëm të premten, mes të cilëve 150 kanë qenë luftëtarë kundër regjimit.
Qeveria siriane i sheh marrëveshjet për evakuime si mënyrën më të mirë për t’i dhënë fund konfliktit gjashtëvjeçar, ndërkohë që opozita deklaron se është e shtrënguar të pajtohet me to nga bombardimet dhe rrethimet e regjimit. /tesheshi.com/
