Forcat afgane të sigurisë i japin fund rrethimit pranë ambasadës spanjolle në Kabul

Pas orësh të tëra shkëmbimi zjarri, mëngjesin e kësaj të shtune ka marrë fund rrethimi i një bujtine pranë ambasadës spanjolle nga talibanët.

Sulmi nisi në të ngrysur të së premtes, në një pjesë të mbikëqyrur e të ruajtur të Kabulit, ku gjenden një numër ambasadash. Një mësymës shpërtheu një makinë-bombë ngjitur me bujtinën, duke u dhënë mundësi tre talibanëve të tjerë të zinin pozicion e të qëllonin mbi forcat e ruajtjes së rendit.

Forcat afgane të sigurisë arritën t’i jepnin fund sulmit, duke vrarë tre luftëtarë talibanë. Ndërkohë, siç njofton shefi i policisë së Kabulit, gjatë përplasjes me armë humbi jetën një punonjës spanjoll i sigurisë, dhe pesë policë afganë u vranë ose u plagosën.

Veç kësaj, u plagosën nëntë civilë afganë dhe një qytetar spanjoll, ndërsa 47 afganë dhe të huaj u shpëtuan teksa gjendeshin në ndërtesat aty afër.

Talibanët gjatë kësaj jave sulmuan dhe aeroportin në Kandahar, ku u vranë më së paku 50 civilë dhe forca sigurie. /tesheshi.com/