Një operacion i koduar si “Sopoti” – mali mbi Lazarat – ka zbuluar parcela të fshehura kanabisi në fshatin simbol të kultivimit të kësaj bime narkotike, duke çuar në arrestimin e 5 personave.
“Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, në vijim të kontrollit të pandërprerë të territorit, gjithashtu mbi bazën e informacioneve të siguruara në rrugë operative, në oborret e 5 banesave u konstatuan të kultivuara bimë të dyshuara narkotike, shërbimet e Policisë ushtruan kontroll.
Si rezultat i operacionit u arrestuan në flagrancë shtetasit:
B.A., 65 vjeç, banues në fshatin Lazarat;
S.A., 40 vjeç, banues në Sarandë;
M.K., 69 vjeç, banues në fshatin Lazarat;
H.N., 46 vjeçe, banuese në fshatin Lazarat;
B.N., 36 vjeçe, banuese në fshatin Lazarat”, thuhet në njoftimin e Policisë.
Në fillimverën e vitit 2015, Policia ndërhyri si kurrë më parë në Lazarat, duke i dhënë fund kultivimit të kanabisit në këtë fshat. Një vit më vonë, kjo do paguhej dhe me humbjen e një jete njerëzore, atë të Ibrahim Bashës, efektiv i FNSH-së, që u qëllua gjatë një operacioni kontrolli në fshat.
Nga ana tjetër, fundi i Lazaratit, u pasua dhe me një kultivim masiv në zona të tjera të Shqipërisë, një fenomen ende i paqartësuar mbi rolin e shtetit në të. /tesheshi.com/
