Operacioni Forca e Ligjit(OML), pjesë integrale e paketës “Anti-KÇK”, vuri nën sekuestro tre automjete të blinduara, pronë e eksponentëve të njohur të botës së krimit, dy prej tyre në pritje për të vërtetuar burimin e pasurive.
Sipas njoftimit të policisë, ka qenë Drejtori i Përgjithshëm Ardi Veliu, ai i cili ka urdhëruar sekuestro për “blindat” e Saimir Taullait, Dashamir Gjokës, si dhe Durim Bamit. Ky i fundit, emër i njohur në zonën e Fushë-Krujës, është ai për të cilin deputeti Tom Doshi pretendonte se i kish thënë që Ilir Meta kërkonte ta vriste, një sagë politiko-kriminale që rezultoi si një sajesë e trashë.
“Në vijim të Operacionit Forca e Ligjit, në zbatim të ligjit special për masat pasurore ndaj individëve të dënuar apo akuzuar për krim të organizuar, Drejtori i Përgjithshëm i Policisë së Shtetit, në bazë të nenit 19 të Aktit Normativ nr. 1, datë 31.01.2020, nxorri urdhrat e sekuestrimit në kushtet e emergjencës për disa automjete të blinduara, të cilat u sekuestruan gjatë operacionit.
Automjetet e sekuestruara janë në pronësi të shtetasve:
Saimir Taullau, banues në Lushnjë, i dënuar për veprën penale “Prodhimi dhe shitja e narkotikëve”;
Dashamir Gjoka banues në Durrës, i dënuar në Itali për trafik të qenieve njerëzore;
Durim Bami banues në Krujë, i dënuar për veprën penale ‘Vjedhja me armë’;
Operacioni vijon dhe OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë”, thuhet në deklaratën e policisë. /tesheshi.com/
