Foltorja hyn sërish në xhami, kundragoditje nga një musliman

Ish-kryeministri dhe ish-kreu demokrat Berisha, sulmoi sërish, ndonëse pa emër, një grup figurash mediatike, të cilët janë të përfshirë në debatin mbi krizën në PD, por që njihen dhe si besimtarë muslimanë.

Dhe, ngase ata janë kundër lëvizjes së tij, ky i fundit ka gjetur rastin për ta shfrytëzuar këtë status të tyre social e shpirtëror për ta ndërtuar një akuzë ndaj tyre.

“Analistët, me në krye Baton Stanishiqin, është një grup tjetër i vogël të cilët ja kanë shitur shpirtin djallit, xhepit të tyre, vjellin vrer gjjithë javës.

Shkojnë të premten në xhami për të larë mëkatet, në fakt hyjnë dhe dalin mëkatarë, ja lëmë Zotit punën e tyre“, tha Berisha.

Reagoi një nga ata, ndonëse jo i studiove, ndoshta dhe jo në mendjen e Berishës teksa i ka thënë këto fjalë.

Namir Lapardhja, një ndër figurat demokrate të Beratit, kritik penëmprehtë i tij këto kohë, duke shkruar:

“Ish-kryeministri Berisha ndërmori sot, ndoshta, një nga sulmet më të pamenduara qoftë edhe nga një ateist i shpallur, nga një komunist, nga një ithtar i largqoftit, teksa mori përsipër të gjykojë se cilit ia pranon Zoti lutjet e cilit jo.

Ky sulm, që do të turpëronte këdo që beson se nuk rrjedhim nga majmuni, mund të konsiderohet si kështjella më e fundme që Berisha nuk e kish prekur, të paktën publikisht.

Dhe duke tentuar edhe rolin më të pamenduar, atë të vetëpërcaktimit se kupton kujt i pranohen lutjet para Zotit, është e kotë të habitemi se si ai nuk e ka problem të sajojë shpifje lidhur me këdo, duke i sulmuar si të paguar nga kundërshtari i tij në parti.

Në fakt, pikërisht kjo gjuhë, që nuk prek vetëm ata që besojnë, por këdo qytetar që beson se fuqia e demokracisë është te pranimi i mendimit të tjetrit që nuk mendon si ty, është edhe gjuha që rrezikon jo vetëm PD-në, por edhe demokracinë, pasi ky model e rikthen një parti në shinat e diktaturës, ku kushdo që mendonte ndryshe linçohej, i bëhej gjyq publik”.

Po cilët janë ata emra analistësh në media, të cilët shkojnë në xhami, njëherësh dhe të rreshtuar krah opozitës por jo Berishës. Ose ndryshe, kritikë me këtë të fundit:

Fitim Zekthi, Ergys Mërtiri, Vehap Kola, Agim Baçi. Të sulmuar më së shumti, me emër e mbiemër, referuar Syri-t, janë tre të parët. /tesheshi.com/