Ali Ahmeti, figura kryesore politike shqiptare në Maqedoni, bujti te Thaçajt e Hashimit, shtëpia pra e ish-presidentit kosovar, i cili është në Hagë duke u gjykuar për krime të pretenduara lufte.
Ai qe aty, siç tha, për t’u dhënë zemër prindërve të Thaçit, teksa djali i tyre lufton për dinjitetin e Kosovës në Gjykatën e Hagës.
“Vizitova sot vatrën familjare të bashkëveprimtarit tim dhe ish-Presidentit të Republikës së Kosovës, Hashim Thaçi, për t’ju dhënë zemër e forcë prindërve dhe të afërmve të tij në betejën e drejtësisë, ku djali i tyre me shokë po mbron dinjitetin e UÇK-së, kauzën e pastër të mbarë popullit të Kosovës”, shkroi Ali Ahmeti pasi u takua e bisedoi me Haxhi Thaçin, të atin e Hashimit.
“Drejtësia vonon, por nuk harron, kështu i thashë Bacit Haxhi kur po kuvendonim mbi vitet e qëndresës kombëtare për lirinë dhe shtetësinë e Kosovës. Krenarë do ta presim bashkë Hashimin me shokë në rikthimin e tij si fitues i drejtësisë! Liria ka emër!”, shprehet Ali Ahmeti.
Nga ana tjetër, fotos ku Alia i ndez cigaren Haxhisë, Edi Rama e ka cilësuar me një fjalë të vetme: “Burra!”. /tesheshi.com/
