Organizatat joqeveritare në Kosovës, Këshilli për Mbrojtjen e të Drejtave dhe Lirive të Njeriut (KMDLNJ) ka kërkuar shkarkimin e ministrit të Jashtëm Behgjet Pacolli, për shkak të një deklarate me përmbajtje “seksiste dhe raciste”, duke iu referuar lobimit të Serbisë kundër anëtarësimit të Kosovës në Interpol.
Sipas këtij këshilli, Pacolli në fjalimin e tij në Komitetin për Punë të Jashtme të Kosovës ka deklaruar se Serbia punësoi një numër femrash të “mirë-veshura” gjatë sesionit të Asamblesë së Përgjithshme të Interpolit në Dubai, të cilat joshën me përqafime përfaqësuesit “zezakë” të vendeve anëtare të Interpolit për të lobuar kundër anëtarësimit të Kosovës në këtë organizatë ndërkombëtare të policisë.
“Ata kishin një duzinë gra të veshur mirë dhe secila prej tyre i shkoi në tryezë përfaqsuesve zezakë, duke iu thënë: “’Më falni, si jeni?’. I përqafonin dhe u linin nga një zarf”, mësohet të ketë thënë Pacolli.
Dështimin për mosanëtarësimin e Kosovës në Interpol, Prishtina zyrtare ia ka adresuar autoriteteve të Beogradit, që sipas tyre kanë lobuar fuqishëm kundër anëtarësimit. Ndërkohë, Pacolli, si një njeri që i dedikon vetes shumë njohje të Kosovës në disa vende afrikane, në pozitën e ministrit të Jashtëm nuk ka rezultatet e pritshme në funksion të njohjeve. /tesheshi.com/
