Për Fondin Monetar Ndërkombëtar është e ngutshme arritja e një marrëveshjeje mbi një program huaje për Greqinë që vendi të mund të paguajë detyrimet e borxhit gjatë muajit korrik të këtij viti.
Bisedimet mes Greqisë, FMN-së dhe eurozonës janë zvarritur prej muajsh, ndërkohë që grekët kanë nevojë për fonde të tjera që të mund të paguajnë këstet e borxhit.
Një zyrtar i lartë i FMN-së kërkoi dje më tepër angazhim nga Athina për reformat, e njëkohësisht kërkoi dhe angazhim nga Europa për lehtësimin e borxhit.
“Eshtë e ngutshme që ne të gjejmë gjuhën e përbashkët për një program dhe që t’i përfundojmë këto diskutime, sepse po godasin ekonominë greke. Nuk ka dyshime për këtë. Çështja është serioze,” tha Poul Thomsen, shefi i departamentit europian të FMN-së.
Me gjithë presionin, FMN-ja nuk ka pranuar deri tani të marrë pjesë në programin e huasë prej 86 miliardë eurosh për të cilin pati pajtim në mesin e vitit 2015 midis eurozonës dhe Greqisë. /tesheshi.com/
