Fluksi i madh i pritjeve në pikën e kalimit kufitar në Morinë pritet të zbutet, pas thirrjeve që u bënë nga Drejtori i Përgjithshëm i Policisë së Shtetit Ardi Veliu.
Veliu u ka kërkuar punonjësve të Policisë kufitare angazhim maksimal dhe performancë duke iu ofruar qytetarëve një shërbim sa më cilësor, duke shtuar se në raste fluksi të zbatojnë procedurë të përshpejtuar.
Për të shmangur qarkullim te paligjshëm, ai tha se nga ana tjetër punonjësit e policisë duhet të ushtrojnë kontroll në vijën e dytë për të gjitha mjetet që dyshohen për paligjshmëri.
Arsyeja e kësaj kërkese është fluksi i madh i qarkullimit për shkak të sezonës. Ai bëri thirrje që të mbrohet maksimalisht edhe kufiri malor nga çfarëdo shkelje e ligjit.
Gjatë mëngjesit të sotëm ka pasur një fluks të madh të qytetarëve kosovarë në drejtim të Shqipërisë, ku vetëm orët e parë të mëngjesit kanë hyrë mbi 5000 shtetas. Në mesin e tyre, një pjesë e madhe vjen nga diaspora e Kosovës, e cila në fund të korrikut nis fluksin që zgjatë për një muaj.
Frekuentimi i bregdetit shqiptar i cili edhe sivjet ka qenë mjaft i preferuar bën që makinat të shkaktojnë jo vetëm flusk kufitar, por edhe ngarkesë të theksuar trafiku në qytetet kryesore turistike. /tesheshi.com/
