Nëntë luftanije ruse dhe kineze janë bërë bashkë në Mesdhe për një stërvitje ushtarake, e cila do të zgjasë deri më 21 maj, dhe është e para mes tyre në këtë hapësirë.
Manovrat do të kryhen në katër grupe taktike, dhe anijet ushtarake-detare do të praktikojnë mbrojtjen kimike, biologjike dhe kundër radiacionit të forcës së përbashkët.
Stërvitja ushtarake vjen në një kohë kur Rusia dhe Perëndimi i kanë të tensionuara marrëdhëniet mes tyre për shkak të Ukrainës.
Nënadmirali Fedotenkov, një prej drejtuesve të kësaj stërvitjeje të përbashkët, ka theksuar se, “Synimi është të forcohet mirëkuptimi reciprok midis flotave ushtarake-detare, në lidhje me nxitjen e stabilitetit, e përballimin e sfidave dhe kërcënimeve të reja në det.” Ai ka bërë të qartë se stërvitja nuk drejtohet kundër një vendi të tretë.
Me të njëjta fjalë e kanë shpjeguar stëvitjen dhe zyrtarët kinezë. Zëdhënësi i Ministrisë së Mbrojtjes së Kinës, Geng Jansheng, ka thënë se, “Qëllimi është thellimi i bashkëpunimit miqësor dhe praktik të dy vendeve, dhe rritja e aftësisë së flotave tona ushtarake-detare për t’iu përgjigjur bashkarisht kërcënimeve detare të sigurisë. Këto stërvitje nuk synojnë një palë të tretë, dhe nuk kanë të bëjnë aspak me situatën rajonale.”
Moska dhe Pekini po e intensifikojnë bashkëpunimin në fushën e mbrojtjes, dhe po duan t’u dërgojnë sinjale SHBA-ve dhe Europës se dy vendet po i mbështesin interesat e njëri-tjetrit. /tesheshi.com/
