Deputetja e PDK-së, Flora Brovina ka kërkuar që të ngrihen aktakuza për krimet serbe ndaj popullatës civile gjatë luftës në Kosovë.
“Kërkoj që Prokuroria e Shtetit të fillojë ngritjen e akuzave për krimet dhe për gjetjen e varrezave masive dhe zhdukjen e personave. Kërkoj që kjo të bëhet për varrezat në Batajnicë, në Petrovosello, në varrezat këtu në Kosovë, për krimet në Kosovë”, tha ajo në seancën plenare.
Brovina shtoi më tej se duhet që të kërkohet përgjegjësi për zhdukjen e Ukshin Hotit dhe të zbardhet masakra në Dubravë, e cila sipas saj, është kryer nga shteti serb.
“Gjithashtu kërkoj që të fillojnë akuza shtetërore për humbjen ose zhdukjen e Ukshin Hotit, kërkojë gjithashtu që të zbardhet masakra në Dubravë, sepse edhe këtë e ka kryer shteti i Serbisë, sikurse tjerat”, deklaroi Brovina.
Kujtojmë se presidenti Thaçi vite më parë paralajmëroi ngritjen e një padie ndaj Serbisë për gjenocid, por e gjitha ka mbetur vetëm një deklaratë e thatë. /tesheshi.com/
