Agjencia turke e lajmeve DHA ka arritur të kontaktojë me vrasësin e pretenduar të pilotit rus më 24 nëntor të vitit të shkuar, pasi avionët luftarakë turq goditën e rrëzuan një të tillë rus SU-24 pas shkeljes së përsëritur të hapësirës ajrore të vendit të tyre.
Alparsllan Çelik, që pretendohet të ketë vrarë Oleg Peshkovin, pilotin rus, i ka deklaruar DHA-së se nuk ka frikë nga rusët, edhe pse raportohet se emri i tij është ndër kryesorët në listat e të kërkuarve të shërbimit të fshehtë rus.
“… Nuk kam frikë të tillë. Ne do ta vazhdojmë luftën tonë deri në ushtarin e fundit, deri në frymën e fundit, e deri në pikën e fundit të gjakut,” ka thënë Alparsllan Çelik.
Ai ka kërkuar më tepër mbështetje nga Turqia për turkmenët në rajon, duke e quajtur të pamjaftueshme atë çka është bërë deri tani.
Në lidhje me situatën aktuale në hapësirën turkmene në Siri, Çelik e ka përshkruar atë si dramatike: “Shumë vende janë boshatisur sot në Bajërbuxhak nën bombardimet ruse, e kontrolli i thuajse tërë fshatrave u ka kaluar rusëve. Të tërë fshatrat, përveç atyre kufitarë, janë nën kontrollin e regjimit. Fshatrat tanë kufitarë po bombardohen rëndë. Rreth 15.000 njerëz jetojnë ende në këto fshatra.”
I pretenduari si vrasësi i pilotit rus ka folur dhe për korridorin kurd që po kërkohet të krijohet në pjesën veriore të Sirisë, në kufi me Turqinë.
Ai është betuar se turkmenët nuk do ta lejojnë kurrë krijimin e një korridori të tillë kurd. Duke i rrëfyer agjencisë së lajmeve DHA se Rusia dhe Gjermania e kanë furnizuar me armë PYD-në, krahun e PKK-së, organizatës terroriste kurde, në Siri, Çelik është shprehur: “… Ne nuk do ta lejojmë kurrë korridorin kurd të planifikuar nga PYD-ja dhe PKK-ja…” /tesheshi.com/
