“Halepi po shndërrohet në një varrezë gjigante”. Kanë qenë këto fjalët e Stephen O’Brien, shefit për çështje humanitare të Kombeve të Bashkuara, gjatë një apeli të bërë në Këshillin e sigurisë së OKB-së, i cili ishte mbledhur në një seance të jashtëzakonshme për të diskutuar në lidhje me gjendjen në qytetet siriane.
“Për hir të humanizmit, u bëjmë thirrje të gjitha palëve dhe atyre që kanë ndikim, të bëjnë gjithçka të mundur për të mbrojtur civilët dhe për të mundësuar qasjen në pjesën e rrethuar të Halepit lindor, përpara se të bëhet një varrezë gjigante”, tha O’Brien gjatë seancës.
Sipas Observatorit sirian për të drejtat e njeriut, mbi 50 mijë persona janë detyruar të braktisin shtëpitë që prej kohës që është forcuar ofensiva e forcave qeveritare për të shtënë në dorë një pjesë të qytetit, e cila është ende në duart e opozitës.
Financial Times shkruan se në Ankara kanë nisur të zhvillohen takime të fshehta mes liderëve të rebelëve sirianë dhe Rusisë, për t’i dhënë fund luftimeve në Halep./tesheshi.com/
