Kreu i partisë opozitare NISMA për Kosovën, Fatmir Limaj, ka folur hapur në emisionin televiziv të RTV21-shit për krizën aktuale politike, për protestën e radhës së opozitës së bashkuar, për çështjen e Asociacionit dhe për punën e bërë me ish-partiakët e tij, konkretisht, me kreun e partisë, Hashim Thaçi.
Edhe pse zgjidhjen për ta lënë pas krizën politike nuk e sheh aq të vështirë, propozimi që jep Limaj nuk është aq shpresëdhënës se mund ta thyejë akullin në skenën politike kosovare, duke pasur parasysh deklarimin e qeverisësve të sotëm se s’do të ketë zgjedhje deri në 2018-tën.
“Mjafton që pas vendimit të Gjykatës Kushtetuese, qeveria të japë dorëheqje, vendi të shkojë në zgjedhje të reja, dhe kriza tejkalohet,” ka deklaruar Limaj.
Por ai thekson se dorëheqja e qeverisë duhet të ngjasë për të dhënë llogari për shkelje të Kushtetutës, e jo pse zgjedhjet po i duhen Hashimit apo Isës.
“Duhet llogari, dhe secili duhet të marrë përgjegjësitë politike,” kanë qenë fjalët e Limajt në RTV21.
Ai ka thënë se krejt çështja është se Asociacionit i duhet bërë vendi, por në kuadër të Kushtetutës, jo duke e shkelur atë.
“Por duhet thënë hapur se kjo që po na kërkohet nga Brukseli nuk ka vend në Kushtetutën e Kosovës. Duhet thënë se duhen bërë ndryshime kushtetuese dhe tani debatohet. Për shembull, a ka mundur me thënë kryeministri në Bruksel se unë nuk e nënshkruaj këtë dhe jap dorëheqjen. Bëja vendin me Kushtetutë,” nënvizon Limaj.
Duke folur për protestën e radhës, lideri i NISMA-s nuk e ka përjashtuar mundësinë që të mbahet në ditën e pavarësisë, më 17 shkurt, por ka bërë të qartë se opozita e bashkuar nuk e ka caktuar ende një datë se kur do të zhvillohet.
Kurse, i pyetur për ish-bashkëpartiakët e tij në PDK, për Hashim Thaçin e Kadri Veselin (edhe pse ky i fundit u anëtarësua zyrtarisht në PDK në nëntor të vitit 2012), Limaj është shprehur se për aq kohë sa ka punuar dhe ka qenë i pranishëm në tavolina ndjehet krenar, pasi asnjëherë nuk është punuar kundër Kosovës. Por, thotë ai, nuk mund të di nëse është bërë diçka tjetër jashtë tavolinave ku nuk kam marrë pjesë.
Përgatiti: Blendi Gashi – /tesheshi.com/
