Shtëpia e Bardhë ka konfirmuar se pas një vendimi gjyqësor, gazetarit të CNN-it Jim Acosta do t’i kthehet përkohësisht akreditimi që iu hoq ditë më parë.
“Ne gjithashtu do të përmirësojmë më tej rregullat dhe proceset për të siguruar konferenca të rregullta dhe korrekte për shtyp në të ardhmen”, tha në një deklaratë zëdhënësja e Shtëpisë së Bardhë, Sarah Sanders.
Gjykatësi federal në Uashington kërkoi më herët se administrata e Presidentit të SHBA Donald Trump të kthejë menjëherë akreditimin e Acosta për të raportuar mbrapa nga Shtëpia e Bardhë.
Gjykatësi Timothy Kelly tha në vendimin se Acosta pësoi “dëm të pariparueshëm” dhe hodhi poshtë argumentin e Shtëpisë së Bardhë që CNN mund të dërgonte tek ai gazetarë të tjerë, njoftoi AP.
Acosta është përplasur vazhdimisht me Trump dhe zëdhënësen Sarah Sanders në konferencat për shtyp në Shtëpinë e Bardhë gjatë dy viteve të fundit.
Javën e kaluar, ai u hoq nga akreditimi pasi u përplas verbalisht me Trump gjatë një konference shtypi.
Trump reagoi ashpër pasi ngriti një pyetje në lidhje me karvanin e emigrantëve që lëviznin nga Amerika e Jugut në kufirin amerikan.
“CNN duhet të ketë turp. Ju jeni një person i tmerrshëm”, i tha Trump gazetarit Acosta.
“Ju jeni armiku i popullit”, shtoi presidenti.
Por Acosta vazhdoi t’i bënte pyetje në lidhje me hetimin e ndërhyrjes së Rusisë në zgjedhjet amerikane, ndërsa Trump u largua nga folësja dhe nuk donte të përgjigjej.
CNN mbështeti gazetarin e saj dhe dënoi sjelljen e tillë Trump, duke i quajtur komentet e tij “jo-amerikane”.
“Mediat e lira janë jetike për demokracinë”, tha CNN. /tesheshi.com/
