Nga Ylli Pata
Ditën e betimit në Kuvend, është munduar mjaft për të vajtur. Ka kohë që është sëmurë dhe seriozisht madje, por entuziazmi për të nisur një mision të ri nuk i mungon. Është deputetja më e re e Kuvendit, Mirela Ferracaku, e cila nëpërmjet telefonit zhvillon një intervistë të shkurtër për tesheshi.com. Realisht është intervista e parë e saj për një media, për të cilën ndryshe nga kolegët e saj, ajo thotë se nuk do ta përdorë për t’u dukur. “Nuk kam dalë kurrë në televizion dhe nuk kam ndërmend të bëhem e bezdishme në ekrane”, thotë zonja Ferracaku, e cila ka pasur dy gëzime këtë muaj: përveçse është betuar si deputete, ajo edhe është fejuar, rast për të cilat ka marrë urime të shumta në faqen e saj në Facebook.
Zonja Ferracaku, përshëndetje urime për hyrjen në Parlament, cili do të jetë synimi juaj për këtë mandat?
Faleminderit për urimin. Unë do të përfaqësoj programin politik të Partisë Kristian Demokrate së cilës i përkas dhe jam e nderuar se do të përfaqsoj zonën e Pukës. Do të vazhdoj të jem pjesë e koalicionin me Partinë Socialiste dhe do të vë në zbatim disa projekte që kemi përgatitur për të zhvilluar nga ana ekonomike dhe sociale banorët e Pukës, e cila është mjaft e varfër. Do të përfaqësoj në mënyrë besnike zgjedhësit që i kanë besuar më 23 qershor PKD-së.
Zonja Ferracaku, para disa ditësh ndaj jush ka pasur sulme nga një organ i një partie homologe me ju, siç është EuroAlbania e Partisë Demokristikane të Nard Ndokës, ju si do t’i përgjigjeshit?
Unë jam besimtare në Zot dhe respektoj të gjitha besimet fetare në vend dhe dua të ruhet bashkëjetesa mes besimeve. Jam përfaqësuese e denjë e Partisë Kristian Demokrate dhe dua që ne të përcjellim mesazhin e ndihmës mes njerëzve dhe jam kundër baltës dhe sulmeve të paprincipta. Unë e di që në Shkodër ka disa grupime pranë Partisë Demokratike që na kanë sulmuar, por unë nuk duhet t’i përgjigjem sulmeve me të njëjtën gjuhë, ndaj ftoj të gjithë kolegët që të japim mesazhin e bashkëpunimit dhe qytetarisë.
Un kam qenë goxha e sëmurë, por tani po bëhem mire, dhe do të jem në formë më të plotë për të dhënë kontributin tim dhe ftoj të gjithë dpeutetët e qarkut Shkodër që të bëhemi një lob për të ndihmuar kryesisht njerëzit në nevojë dhe veçanërisht fëmijët. Duhet ta bëjmë botën tonë më të butë dhe më njerëzore.
Zonja deputete faleminderit dhe ju uroj suksese në misionin tuaj..
Ju falenderoj dhe ju.
/tesheshi.com/
