Portugalia është kualifikuar për në fazën gjysmëfinale të Europianit pasi eliminoi me 11-metërsha Poloninë. E veçanta e këtyre dy skuadrave është se nëse portugezët shkojnë në gjysmëfinale pa fituar asnjë takim gjatë lojës së rregullt prej 90 minutash, polakët largohen nga veprimtaria pa humbur asnjë ndeshje në minutat e rregullta.
“Mendoj se fituam ndershmërisht kundër një ekipi shumë të mirë,” deklaroi pas çerekfinales Fernando Santos, trajneri i portugezëve.
“Polonia e nisi shumë mirë. Ne i lamë ata ta marrin për pak kontrollin e lojës. Fatmirësisht e gjetëm golin përmes Renato [Sanches-it], por Polonia është një ekip shumë i mirë.”
“Ndërsa bëjmë përpara, ne i afrohemi objektivit tonë. Kemi shtysën dhe ambicien, e duam t’i sjellim gëzim popullit portugez. Penalltitë janë një lotari, por ne treguam karakter.”
“Të dy ekipet luajtën mirë sonte [mbrëmë],” do të thoshte, në anën tjetër, Adam Nawalka, trajneri i polakëve. “Ishte një takim plot me sfida. Nuk do të doja të veçoja askënd për ta falënderuar. Çdonjëri meriton falënderim.”
“Për fat të mirë, këto kampionate tregojnë se janë fillimi i një ere të mrekullueshme për futbollin polak. Robert Lewandowski është dhe do të jetë gjithmonë një lojtar i madh për këtë ekip. Ai është kapiteni. Ai i motivon lojtarët në fushë dhe jashtë saj.”
“Dua t’i falënderoj të gjithë lojtarët për zemrën dhe ambicien që treguan në të gjitha ndeshjet tona. Mund të jemi veç të lumtur.”
Ndërsa lojtari më i mirë i ndeshjes, shënuesi i golit të barazimit për portugezët, Renato Sanches, do të rezervonte këto fjalë për gazetarët: “Eshtë një moment i mrekullueshëm për ekipin, për mua, sepse kam shënuar. Kemi punuar fort dhe kemi dhënë më të mirën. Njerëzit na kritikojnë, por nuk e vrasim mendjen, sepse jemi në gjysmëfinale.” /tesheshi.com/
