Nga Bardha Nergjoni
Të gjithë u befasuan ditë më parë kur panë ambasadorin Lu që ia merrte këngës “Ja na erdhi viti i ri”. Kreu i diplomacisë amerikane në Tiranë, veç angazhimit të tij “dramatik” për reformën në drejtësi dhe dekriminalizimin e politikës, shfaqipër disatën herë, kësaj radhe në një më mënyrë mjaft origjinale, prirjen e tij sportive dhe për të qenë sa me shqiptar në vendin ku po shërben prej disa vitesh, pra për t’u ndjerë tamam si “njeri i shtëpisë” kur i thonë.
Po kush ishin ata çuna shqiptarë krah tij që u binin instrumentave dhe këndonin bashkë me Lu-në?
Ata janë 5 djem “Alar Band”-it, grupit më të njohur për momentin, të gjithë të dalë nga “Onufri” i Elbasanit; vokalisti Xhieldo Hyseni; Aldo Meta me violinë; Ardit Serica në piano (keyboard); Renato Kodra në firzamonikë (açordion); Rremi Shrali në bateri. Producent është Elgit Doda dhe kostumograf Joni Peçi. I gjen bashkë në qendër të Elbasanit, në vendin që thuajse i mbledh çdo natë. Këngën me ambasadën amerikane e quajnë dhuratën e paparashikuar të këtij fundviti, ndërsa eksperiencën me stafin e saj të papërsëritshme.
“Alar band”, i keni bërë një mbyllje shumë të bukur këtij viti me këngën ‘Ja na erdhi Viti i Ri’, si urim i ambasadës amerikane për shqiptarët. Si erdhi ky bashkëpunim?
Renato: Ky bashkëpunim na erdhi si surprizë e bukur për këtë vit. Një përfaqësues i ambasadës amerikane na telefonoi, pasi na kishte ndjekur tek “Kënga Magjike” dhe kështu nisi. Kënga është regjistruar në pak kohë. Për dy ditë kemi zgjedhur këngën bashkë me stafin e ambasadës dhe kemi bërë regjistrimin. Kënga u regjistrua tek shtëpia e ambasadorit Lu dhe ishte një eksperiencë e rrallë për të gjithë ne. Për pak kohë ky urim u bë viral në internet dhe na shërbeu ne dhe ambasadës amerikane për të përcjellë urimin për të gjithë shqiptarët në këtë fundviti.
Xhieldo: Ishte shumë e papritur por një eksperiencë shumë e bukur. Mbyllja më e bukur e 2016.
Ju jeni në treg prej 4 vjetësh dhe ky bashkëpunim ishte një reflektim i asaj që keni arritur deri tani. çfarë mësuat nga kjo eksperiencë?
E kemi vlerësuar shumë këtë eksperiencë, jo vetëm për faktin se kjo këngë ka pasur shumë sukses por edhe për kulturën e punës dhe disiplinën që na mësoi. Ne nuk kemi shumë rregull si shumica e shqiptarëve dhe kjo na vlejti që të vlerësojmë si punohet dhe si është korrektësia maksimale. Kjo këngë u pasua nga një punë shumë e madhe, me përkushtim dhe shumë dashuri. Me këtë këngë kemi përmbyllur dhe një vit mjaft të suksesshëm për grupin tonë.
Cili është çelësi i suksesit të grupit tuaj?
Xhieldo: Para se të formohej grupi ne kemi qenë miq shumë të mirë. Pra ishim miq e më pas u bëmë grup artistësh. Aldo dhe Arditi kanë qenë themeluesit e grupit. Më pas erdha unë dhe Renato, e rrugës është plotësuar me elementë të tjerë. Sigurisht që ishim një formacion ndryshe nga të tjerët pasi nuk jemi grup rroku. Duhej menduar për të ingranuar firzamonikën dhe violinën dhe prandaj kemi zgjedhur këtë lloj muzike. Sigurisht që ka dhe pak folk duke iu përshtatur vendit ku jemi. Sa i përket çelësit të suksesit mendoj se është kombinim i të gjithave: këngët, muzika, instrumentet, veshjet që gjithmonë bëjnë diferencën. Për këtë falenderojmë producentin tonë Elgid Doda dhe stilistin Joni Peçi.
Ju keni dhe një surprizë për publikun me të hyrë 2017-ta?
Surprizën e kemi gati. Sa të hyjë 2017 do të fillojë kënga jonë më e re me klip. Ka kohë që është përgatitur dhe në 24.00 të datës 1 janar starton kënga që mund ta gjeni në “fanpage”. Projekti i radhës do të jetë shumë i bukur dhe besojmë se do të pëlqehet nga të gjitha grupmoshat. /tesheshi.com/
