Pas kreut të Grupit Parlamentar të Partisë Demokratike, Edi Paloka është radha e deputetit, Flamur Noka për t’u përjashtuar nga punimet e Kuvendit. Por, ky i fundit ka marrë masë dënimi edhe më të rreptë nga Byroja e Kuvndit, duke e përjashtuar atë për 10 ditë.
Shkak u bë incidenti i një dite më parë (e martë) gjatë komisionit të Sigurisë. Noka përdori fjalë jo etike ndaj kryetarit të këtij komisioni, Spartak Braho, duke e quajtur atë të paaftë për të drejtuar takimin. Edhe më të rënda ishin fyerjet për ministrin e Brendshëm, Saimir Tahiri, të cilin deputeti demokrat e quajti “karagjoz”. Debati nisi pasi ministri do të largohej, për të ndjekur axhendën e tij, për në një aktivitet tjetër, ndërsa Noka nuk e lejonte të largohej pa mbaruar fjalën e tij.
Byroja e Kuvendit u mblodh pasditen e së mërkurës nën drejtimin e nënkryetares, Valentina Leskaj, pas letrës së dërguar nga Komisioni i Sigurisë për masë ndaj Nokës.
Menjëherë pas këtij vendimi, ka reaguar për mediat vetë deputeti Noka, i cili tha se veprimi i tij erdhi si pasojë e situatës jo serioze që u krijua nga përfaqësuesit socialist.
“Tahiri u soll si një klloun. Nuk foli për buxhetin e Ministrisë së Brendshme, por luajti teatër. Është e papranueshme një arrogancë e tillë. Dje, ai ka shprehur neglizhencë të madhe për qytetarët e këtij vendi. Për sa kohë të jem parlamentar, unë nuk do të pranoj kurrë këtë situatë”, u shpreh Noka.
Një ditë më parë, Byroja e Kuvendit përjashtoi edhe Edi Palokën, pasi shtyu fizikisht në foltoren e parlamentit ministrin e Shëndetësisë, Ilir Beqaj gjatë kohës kur ky i fundit do të merrte fjalën./tesheshi.com
