“Në një skenë të pamendueshme një vit më parë, kur afaristi miliarder ishte një rishtar politik që përballej me shumë armiqësi në partinë e tij, Trump mbajti fjalimin e tij të parë para senatorëve dhe anëtarëve të Kongresit,” shkruan mes të tjerash The Guardian duke përshkruar fjalën e parë të presidentit të ri amerikan para Kongresit.
Donald Trump iu drejtua Kongresit me tone pozitive, duke përcjellë mesazhe uniteti e duke kërkuar bashkëpunim nga republikanët e demokratët për t’i ndryshuar pamjen vendit.
“Jam këtu sonte për të dhënë një mesazh fuqie dhe uniteti; është një mesazh i dhënë thellësisht nga zemra ime. Një kapitull i ri i madhështisë amerikane po fillon tani. Një krenari e re kombëtare po vërshon anembanë vendit tonë.”
“Amerika duhet t’i vërë qytetarët e saj të parët…, sepse vetëm atëherë mund ta bëjmë vërtet përsëri Amerikën të madhe,” u shpreh presidenti i SHBA-së.
Ai vijoi më pas me premtime, duke nënvizuar, “Industritë në agoni do të kthehen në jetë. Veteranët heroikë do të marrin kujdesin për të cilin kanë dëshpërimisht aq nevojë. Ushtrisë sonë do t’i jepen burimet të cilat luftëtarët e saj trima aq shumë i meritojnë. Infrastruktura e copëtuar do të zëvendësohet me rrugë, ura, tunele, aeroporte dhe hekurudha të reja… Mbi të gjitha, ne do t’i mbajmë premtimet tona për popullin amerikan.” /tesheshi.com/
