Komisioneri i Lartë i OKB për të Drejtat e Njeriut, Zeid Raad Al Husein shprehu shqetësim në lidhje me thirrjen e Presidentit Tramp në Davos për të gjitha vendet që të ndjekin interesat e tyre, duke paralajmëruar se kjo do ta kthente botën në rrethanat që kishin mbretëruar para luftërave botërore.
“Ky është skenar i shekullit të 20-të”, tha Hussein.
“Tramp u ka bërë thirrje të gjitha vendeve të ndjekin interesat e tyre, pavarësisht se, nëse kjo bëhet, nëse çdo vend ndjek axhendën e tij, do të përplaset me axhendën e të tjerëve dhe do të kthejë botën në vitin 1913”, paralajmëroi Hussein në Davos.
Më herët, në fjalimin e tij në Forumin Ekonomik Botëror, Tramp kërkoi të tërheqë investime të huaja duke thënë se SHBA ishte “e hapur për biznes”, duke premtuar të ndërmerrte masa, siç tha ai, kundër marrëveshjeve të padrejta tregtare.
Duke përsëritur parullën e tij “Amerika në vendin e parë”, Tramp tha se pret që të gjithë liderët botërorë të vënë në vend interesat e vendeve të tyre.
Sipas fjalëve të Husseinit, një politikë e tillë do të bënte që çdo gjë të shpërbëhet, dhe do të sillte vuajtje të mëdha të njerëzve, njofton Reuters.
Presidenti Tramp vazhdoi me kritikat e tij ndaj mediave në Forumin Ekonomik Botëror në Davos, duke i quajtur ato “të këqija” dhe “të rreme”, duke shkaktuar mosmiratim të një pjese të audiencës. /tesheshi.com/
