Vendndodhja e pazakontë – stacioni i metrosë së Sheshit të Pavarësisë, i cili përdoret si strehë – u zgjodh për shkak të kushteve të luftës për mbajtjen e një konference për shtyp të presidentit ukrainas Volodymyr Zelensky.
Në një moment, teksa fliste për njerëzit që kanë humbur fëmijët e tyre, Volodymyr Zelensky mezi e përmbajti veten të mos derdhte lot, duke bërë një grimasë të dhimbshme që dukej qartë në fytyrën e tij, por disa nga të pranishmit reaguan – një gazetar qau duke dëgjuar fjalimin e tij me ndihmën e telefonit, raportojnë mediat.
Zelensky zbriti nga shkallët lëvizëse për në stacion dhe doli në skenë me një karrige dhe një tavolinë me flamurin ukrainas pranë tij për t’iu përgjigjur pyetjeve të gazetarëve që mbushën hapësirën para tij.
Ndërsa konferenca filloi me qetësi, më vonë dukshëm i ngarkuar emocionalisht, Zelensky vazhdimisht u kërkoi gazetarëve t’ia përsërisnin pyetjen
Gazetarët e pyetën nëse ai ende këmbëngul për një takim me presidentin rus Vladimir Putin, vendi i të cilit filloi një pushtim të Ukrainës në shkurt, dhe nëse ai mendonte se ato bisedime mund t’i jepnin fund luftës.
Zelensky u përgjigj se luftën mund ta ndalë vetëm ai që e nisi dhe theksoi se “çdo njeri i shëndetshëm(mendërisht) do të zgjidhte rrugën diplomatike në vend të asaj ushtarake”. Zelensky përkujtoi se që në fillim ai “insiston në negociata me liderin e Federatës Ruse”.
“Unë besoj se çdo takim përmes një ndërmjetësi nuk do të japë efektin e dëshiruar,” tha Zelensky, duke këmbëngulur për të qenë ballë për ballë, sy më sy me Putinin.
I pyetur nëse kishte frikë nga takimi me Putinin, duke pasur parasysh se anëtarët e ekipit negociator joformal ruso-ukrainas dyshohet se kishin simptoma të helmimit, Zelensky e quajti atë “tentativë për vrasje” dhe tha se ekipi i tij i sigurisë dhe familja e tij ishin të shqetësuar për ta.
“Unë nuk kam frikë nga takimi me Putinin, as nga tentativa për vrasje. Nuk kam të drejtë të kem frikë sepse njerëzit tanë kanë treguar se nuk kanë frikë nga asgjë. Ata kanë frikë për fëmijët e tyre, e vërtetë, por njerëzit ndaluan dhe tanket nga pafrika”, tha Zelensky.
Zelensky tha gjithashtu se Ukraina do të pezullojë bisedimet e paqes me Moskën nëse Rusia vret mbrojtësit e Mariupolit ose vazhdon me një referendum për pavarësinë në rajonet jugore të pushtuara pjesërisht të Kherson dhe Zaporozhye.
“Nëse njerëzit tanë vriten në Mariupol, nëse thërrasin pseudo-referendum në pseudo-republikat e reja, Ukraina nuk do të marrë pjesë në asnjë proces negociues”, tha Zelensky.
Ai gjithashtu tha se ishte “i gatshëm të shkëmbejë ushtarët tanë që mbrojnë Mariupolin në çdo formë, në mënyrë që të largohen ata njerëz që janë në një situatë të tmerrshme, të rrethuar”. Ai shtoi se për herë të fundit kishte biseduar me ushtarët e ngujuar në bodrumet e fabrikës Azovstal.
“Sot është një nga ditët më të vështira që nga fillimi i rrethimit rus të Mariupolit në fillim të shkurtit”, theksoi Zelensky.
Në një moment, Zelensky iu desh të ndërpresë konferencën teksa kaloi treni. Ai tha gjithashtu se Ukraina do t’i kthejë të gjitha pjesët e territorit të pushtuar nga Rusia dhe vlerësoi se për vite pas luftës do të jetë në gjendje gatishmërie ushtarake, siç është edhe Izraeli, ndonëse Rusia s’është Palestinë. Madje në kontekst krahasimor të drejtë, Rusia është Izrael e Ukraina është Palestinë.
Zelenski foli në konferencë edhe për sulmin me raketa në Odessa në jug të Ukrainës, ku të paktën pesë u vranë dhe 18 u plagosën. Mes jetëhumburve që dhe një foshnjë.
“Vdiq një foshnjë tre muajshe. Ata vranë një foshnjë tre muajshe. Lufta filloi kur ky foshnjë ishte një muajsh. A mund ta imagjinoni se çfarë po ndodh? Ata janë thjesht bastardë, thjesht bastardë, unë nuk kam asnjë fjalë të tjera për t’u përdorur në këtë kontekst. Ata janë thjesht bastardë,” tha ai.
Shikoni konferencën e pazakontë për shtyp:
