Fjalimi i zëvendëspresidentit amerikan J.D.Vance në Konferencën e Sigurisë në Mynih ishte padyshim një tronditje e fuqishme për Evropën, e cila përjetoi dhe më shumë “klimën” e lidershipit të ri amerikan dhe të ashtuquajturën “doktrinën e Trump”.
Në fund të fundit, siç tha vetë Vance në një moment në fjalimin e tij, “ka një sherif të ri në qytet”.
Gjatë fjalës së tij, zv/presidenti amerikan iu drejtua Evropës me tone të larta dhe tejet kritike, duke thirrur liderët e Kontinentit të Vjetër për çështje si liria e fjalës dhe emigracioni, të cilat SHBA i ka vendosur mjaft lart në axhendën e saj.
Fjalimi i Vance i habiti audiencën në dhomën në të cilën foli – pavarësisht faktit se në fund ai citoi një thënie të Papa Gjon Palit II – duke u bërë thirrje liderëve “të mos kenë frikë” dhe të “përqafojnë atë që ju thonë njerëzit tuaj, edhe kur është e habitshme, edhe kur nuk jeni dakord”.
“Ne nuk duhet të kemi frikë nga njerëzit tanë, edhe kur ata shprehin mendime që nuk pajtohen me udhëheqjen e tyre”, përfundoi ai duke marrë duartrokitje të vakëta.
“Nëse ju keni frikë nga votuesit tuaj, Amerika nuk mund të bëjë asgjë për ju; në fakt, nuk mund të bëni ndonjë gjë për popullin amerikan që më zgjodhi mua dhe zgjodhi presidentin Trump”, shtoi Vance, duke shkaktuar një valë reagimesh.
Vance u shfaq kritik edhe për menaxhimin e emigracionit.
“Sa herë duhet t’i pësojmë këto dështime të tmerrshme përpara se të ndryshojmë kursin dhe të drejtojmë qytetërimin tonë të përbashkët në një drejtim të ri?” tha ai, ndërsa iu referua edhe Brex-it ku njerëzit votuan për liderët politikë që premtuan t’i jepnin fund emigracionit të pakontrolluar.
Sa i përket ekstremit të djathtë, ai tha se “nuk ka vend për mure zjarri”.
Ai kritikoi gjithashtu organizatorët e Konferencës së Mynihut për pengimin e partive populiste që të marrin pjesë në këtë ngjarje. “Ne nuk duhet të pajtohemi […] por është detyrimi ynë që të paktën të angazhohemi në dialog me ta.”
Vance foli për interesa personale të fshehura pas fjalëve të shëmtuara të epokës sovjetike që nuk e pëlqejnë idenë se dikush me një pikëpamje alternative mund të shprehë një mendim tjetër ose, Zoti na ruajt, të votojë ndryshe ose, edhe më keq, të fitojë zgjedhje.
Në të njëjtën kohë, ai kritikoi Evropën për kufizimin e lirisë së fjalës. “Ne duhet të bëjmë më shumë sesa të flasim vetëm për vlerat demokratike. Ne duhet t’i jetojmë ato. Brenda kujtimit të gjallë të shumë prej jush në këtë dhomë, Lufta e Ftohtë vuri përballë mbrojtësit e demokracisë kundër forcave shumë më tiranike në këtë kontinent. Dhe mendoni se cila anë në këtë luftë censuroi disidentët, mbylli kishat, anuloi zgjedhjet. A ishin të mirë? Patjetër që jo”, tha ai. /tesheshi.com/
