Sot shënohet 19-vjetori i vrasjes së ish-kryeministrit serb Zoran Gjingjiç.
Gjingjiç erdhi në pushtet pas rrëzimit me revolucion të Sllobodan Millosheviçit.
Disa vite më vonë, më 12 mars 2003, Gjingjiç u vra në mënyrë mafioze.
Ai u vra vetëm katër ditë para se të nënshkruante një Akt të ri Kundër Krimit të Organizuar. Pas vrasjes së Gjingjiçit, në Serbi u shpall gjendja e jashtëzakonshme dhe filloi një operacion policor i quajtur “Saber”, në të cilin u arrestuan më shumë se 11,000 njerëz.
Gjingjiç e udhëhoqi Serbinë drejt Evropës dhe një numër i madh i qytetarëve të këtij vendi ende mbajnë zi për të. Ai ka pasur shpesh fjalime mbresëlënëse, tejet motivuese dhe ky është padyshim një nga më të famshmit.
“Nuk ka gjumë. Nuk mund të jesh kampion bote duke fjetur. Flini pesë, gjashtë orë, çfarë ju duhet më shumë për të fjetur. Do të flini kur të dilni në pension. Pensionistët mund të flenë. Nëse nuk jeni pensionist, mos flini!
Nuk ka të shtuna, të diela, pushime. Nëse doni të arrini një qëllim të madh, nuk ka festime. Nuk ka asnjë – ka 170 festime në Serbi në vit. Ne do të festojmë kur të fitojmë, pa fitore nuk mund të festojmë”, do thoshte Gjingjiç për të motivuar serbët.
Në gusht 2003, 44 persona u paditën për përfshirje në vrasjen e kryeministrit Gjinxhiç dhe i pari në listën e të paditurve, Milorad Ulemek Legija, iu dorëzua autoriteteve serbe më 2 maj 2004.
Gjyqi i të akuzuarve për vrasjen e kryeministrit Gjingjiç filloi më 22 dhjetor 2003, në Gjykatën e Qarkut të Beogradit.
Ish-komandanti i “Beretave të Kuqe”, pikërisht Milorad Ulemek, është dënuar me 40 vite burg për organizimin e atentatit ndaj kryeministrit. Me të njëjtin dënim është dënuar edhe Zvezdan Jovanoviç, autori i drejtpërdrejtë i vrasjes dhe ish-zëvendës i Ulemekut.
Gjingjiq u varros më 15 mars 2003 në rrugicën e” qytetarëve me merita” në Varrezat e Reja në Beograd, në prani të më shumë se 70 delegacioneve shtetërore të huaja. /tesheshi.com/
