Një prej fenomeneve në komunikim që po shoqëron mandatin e parë të presidentit Trump, janë dhe gafat e tij të shumta, që, në këtë epokë të rrjeteve sociale, përftojnë një dimension viral të jashtëzakonshëm, edhe të tipit “miza bëhet buall”.
Por gjithsesi ato nuk mund të krahasohen me një ndër gafat më epike të paaradhësve të tij, presidentit Reagan, e cila ishte me shumë zarar për kohën, pasi mund të çonte deri në shpërthimin e një lufte botërore.
35 vjet më parë, më 11 gusht 1984, në kulmin e ndarjes së botës nga Lufta e Ftohtë, Reagan po përgatitej të mbante një fjalim në Radion Publike Kombëtare, ku do të njoftonte një ligj të ri.
Më saktë do thoshte këto fjalë: “Të dashur amerikanë! Unë jam i kënaqur t’ju them sot që kam nënshkruar një ligj që do të lejojë që grupet fetare të studentëve të fillojnë të shijojnë të drejtën që u është ndaluar prej kohësh – lirinë për t’u mbledhur në shkollat e mesme publike gjatë orëve jashtë mësimore…”, do ishte fjalimi Reaganit në mikrofon.
E ndërsa bëntë një provë, Regan iu drejtua mikrofonit:
“Të dashur amerikanë, unë jam i kënaqur t’ju them sot që kam nënshkruar një ligj që do ta nxjerrë Rusinë jashtë ligjit përgjithmonë. Ne do të fillojmë bombardimet në pesë minuta.”
Kjo deklaratë rrodhi më vonë për publikun dhe mesazhi i Reaganit “ne fillojmë të bombardojmë për pesë minuta” u bë një nga gafat më të mëdha por dhe në të rrezikshme të viteve ’80, një ngjarje që nuk ishte gjë tjetër veçse shaka.
Kështu që dy muaj më vonë, nga Tokio u raportua se Ushtria e Lindjes së Largët e BRSS ishte në gatishmëri 30 minuta pas njoftimit të Reaganit. Ky informacion u konfirmua nga kongresisti amerikan Michael D. Barnes së bashku me Sekretarin e atëhershëm të Mbrojtjes, Caspar Weinberger.
Megjithëse kjo nuk ishte hera e parë që Reagan bënte shaka ndërsa fliste ose i drejtohej kombit, agjensia zyrtare e lajmeve sovjetike TASS e dënoi atë, duke njoftuar se “BRSS dënon këtë sulm armiqësor nga presidenti amerikan” dhe se “kjo sjellje është në kundërshtim me përgjegjësinë e madhe që barten nga kokat e shteteve bërthamore për fatin e popujve të tyre dhe njerëzimit”. /tesheshi.com/
