Michelle Obama ka mbajtur një fjalim të fuqishëm gjatë Konventës Kombëtare Demokrate, ku zonja e parë u fokusua në rolin e rëndësishëm që do të ketë presidenti i ardhshëm – nëse do të jetë Hillary Clinton – siç tha ajo, “në formimin e ardhmërisë së fëmijëve tanë për 4 deri 8 vitet e ardhshme”.
“Jam këtu, për të thënë se në këto zgjedhje është vetëm një person të cilit i besoj me përgjegjësi të plotë për të qenë president i SHBA, e ajo është mikja ime Hillary Clinton”.
Obama hapi fjalimin e saj duke folur për udhëtimin e saj në Uashington D.C. dhe sfidat me të cilat është përballur në Shtëpinë e Bardhë; dhe se si kjo retorikë e urrejtjes ndaj Barack Obamas ka ndikuar në vajzat e tyre.
Znj. Obama më pas ka përkrahur znj. Clinton si një “shërbyese publike i vërtetë”, e cila e ka dedikuar jetën e saj në përmirësimin e Amerikës. “Kur ajo nuk është nominuar tetë vjet më parë, nuk ka qenë as e zemëruar as e zhgënjyer. Ajo nuk i mbledhi plaçkat për të shkuar në shtëpi. Hillary si një shërbyes i vërtetë publik, e di se kjo çështje është më e madhe sesa dëshirat dhe zhgënjimi i saj”, tha Zonja e Parë.
“Kur mendoj se çfarë presidenti dëshiroj unë për vajzat e mia dhe fëmijët tanë, dëshiroj dikë që ka dëshmuar forcë për të vazhduar më tutje, dikë që e njeh mirë këtë punë dhe e merr seriozisht atë; dhe dikë që e di se çështjet me të cilat do të ballafaqohet nuk janë bardhë e zi”, vijoi ajo më pas/
Ajo përshkroi ish-sekretaren e shtetit si një politikane të çeliktë, e cila nuk merr vendime të papritura, dhe e cila nuk zgjedh rrugën më të lehtë për zgjedhjen e problemeve.
“Ju nuk bën të jeni ofendues dhe të prirur për të shpërthyer. Ju duhet të jeni të qëndrueshëm, të fortë dhe mirë të informuar”, ka thënë Michelle.
Ajo gjatë adresimit para pjesëmarrësve të konventës ka folur edhe për ardhmërinë e vajzave të saj.
“Duke iu falendëruar znj. Clinton, unë, vajzat e mia dhe gjithë fëmijët tanë, prej tani e tutje mund të konsiderojnë normale që një grua të mund të bëhet president i SHBA-ve”, ka thënë Michelle Obama me zërin e saj i cili po dridhej prej emocioneve.
“Çdo mëngjes zgjohem në shtëpinë të cilën e kanë ndërtuar skllevërit dhe shikoj vajzat e mia, dy të reja afro-amerikane të bukura, intelegjente të cilat lozin me qentë e tyre në oborrin e Shtëpisë së Bardhë”.
Zonja e parë Michelle Obama, ka nxitur entuziazëm të paparë momentin kur ka kritikuar kandidatin republikan Donald Trump.
“Mos lejoni dikë të ju thotë sesi ky vend nuk është më i miri në botë, dhe se si duhet ta bëjmë përsëri të tillë”, ka thënë Michelle, duke iu referuar slloganit të Donald Trampit: “Ta bëjmë Amerikën përsëri vendin më të mirë në botë”.
“Ngase Amerika është, mu tani, vendi më i miri në botë”, ka thënë gruaja e presidentit aktual, Barack Obama.
Fjalimi i saj emocional dhe elokuent është pritur shumë mirë nga demokratët, prandaj besohet se ajo ka sjellë unitet të mjaftueshëm brenda partisë, vlerëson AFP.
Një unitet i tillë ka munguar ditën e parë të Konventës, kur ithtarët e Bernie Sanders, të zemëruar për shkak zbulimit të e-mailave të cilat shpërfaqin tendencën e Partisë Demokratike për diskreditimin e fushatës së Sanders, kanë fishkëlluar pas çdo fjalimi të folësve të cilët kanë shprehur mbështetje për znj. Clinton. /tesheshi.com/
