Ish-drejtori i Policisë së kryeqytetit nën qeverisjen e Berishës, Erzen Breçani, i cili u arrestua pak ditë më parë së bashku me të birin në kërkim, Eralbi, Breçani, si dhe shtatë efektivë policorë si të përfshirë në trafik droge, ka dëshmuar në seancën e parë gjyqësore për masën e arrestit se ai vetë është i pafajshëm, se pra ndodhet pas hekurave për shkak të djalit, të cilin siç ka thënë, e ka këshilluar që mos merret me punë të paligjshme.
“Nëse jam në burg jam prej djalit. E kam këshilluar të mos merret me gjëra të paligjshme. Nuk e di ça ka bërë, nuk kam prova me ça merret im bir. Vetë i kam shërbyer këtij shteti ku kam vënë dhe jetën në rrezik”, kanë qenë fjalët e këtij ish-kuadri të lartë policor, të cilin mazhoranca socialiste nuk pranoi të vijojnë karrierën pas ardhjes në pushtet në 2013-ën.
Në seancë, para gjykaatës, Breçani ka përmendur disa nga aksionet që ka bërë dhe personazhet që ka arrestuar, si provë që ai personalisht i ka qëndruar besnik shtetit e ligjit edhe pa qenë nën uniformën blu. /tesheshi.com/
