“Mos më merr në qafë”, këto ishin fjalët e fundit që gjyqtarja e Shkodrës, Fildes Hafizi, i ka thënë ish-bashkëshortit të saj pak momente para se ai ta vriste në zonën e e njohur si Xhamlliku në Tiranë, dy ditë më parë.
Fadil Kasemi, 53-vjeç, tashmë i arrestuar nga policia, ishte liruar nga burgu në janar të 2017 falë një amnistie, ndërsa ishte dënuar për kërcënimet dhe dhunën e ushtruar ndaj ish-bashkëshortes që i morri jetën.
Një krim i paralajmëruar, i cili mund të parandalohej nëse institucionet do të kishin marrë më seriozisht shqetësimet e 39-vjeçares, nënë e dy fëmijë.
Pak momente para ngjarjes, viktima Fildes Hafizi ka shkuar me shpejtësi në makinën e saj, por nuk ka mundur ta ndezë dhe të largohet, pasi 53-vjeçari e qëlloi me plumba nga xhami duke e lënë të pajetë.
Sipas gazeta Shqiptare, një bisedë të fundit me gjyqtaren ka rrëfyer edhe vajza në parukerinë ku Fildes Hafizi kishte shkuar për të rregulluar thonjtë.
“Dëgjova krismat. Në fillim mendova se nuk ishin të shtëna me armë. Por, kur dola në derë të shihja, u trondita. Pashë të gjakosur në makinë klienten time”, thotë ajo.
E tronditur nga skena e rëndë, e reja e cila nuk deshi të identifikohej me emër tha se Dezi ishte kliente e saj dhe vetëm pak sekonda para ngjarjes kishte qenë aty.
“Ishte kliente këtu. Erdhi bëri thonjtë. E dija që ishte banore këtu pranë, por asnjëherë nuk i kam ditur me detaje problemet që kishte pasur me të shoqin”, tha ajo.
Ndërsa, përsa i përket momentit kur ndodhi ngjarja, vajza tha se nuk kishte parë gjë, pasi derën e sallonit të bukurisë e mbante të mbyllur.
“Nuk e pash se si ndodhi ngjarja, sepse unë e mbyll gjithmonë derën kur punoj. Edhe kur Dezi doli që këtu, e mbylla sërish, sepse kisha njerëz. Vetëm kur pas disa sekondash dëgjova krismat. Kur dola në derë të shihja çfarë ishte dhe kur pashë atë lloj situate, u tmerrova. E përjetova shumë keq”, rrëfeu ajo.
Po ashtu, vajza tregoi edhe për bisedën që kishte kryer me të përgjatë një ore.
“E dija që ishte gjyqtare. Po flisnim për punën në përgjithësi. Ajo ishte një zonjë e vërtetë, e përkushtuar në profesionin e saj, për veten, për fëmijët dhe për familjen e saj”, përfundoi ajo.
53-vjeçari pasi qëlloi për vdekje ish-bashkëshorten u largua menjëherë prej aty për t’iu arratisur policisë. Prej andej, autori ka parë të parkuar një furgon mallrash dhe menjëherë ka hipur në të duke kërcënuar shoferin me pistoletë në kokë që të ecte dhe ta çonte në periferi të Tiranës. Sipas burimeve, drejtuesi i mjetit, i frikësuar nga kjo situatë ka ndezur makinën dhe pasi ka bërë disa metra rrugë, në afërsi të komisariatit nr.1 ka parë një patrullë policie. Ka hapur krahun dhe ka zbritur menjëherë dhe ju është drejtuar uniformave blu: “kapeni personin që kam në makinë, ai ka armë me vete, mund të jetë vrasësi”.
Pas kësaj, oficerët e policisë kanë bërë shoqërimin e tij, ku rezultoi të ishte autori i vrasjes së rëndë. Me vete iu gjet edhe arma e krimit. 53-vjeçarit i është bërë edhe testi i alkoolit, i cili ka rezultuar 0.045%. /tesheshi.com/
