Kryeministri Rama i mëshoi fort çështjes së Kosovës në fjalën e tij në Sesionin e 76-të të Asamblesë së Përgjithshme të OKB-së, ku u shpreh se, “kjo Asamble e madhe nuk është e nuk do të jetë e plotë pa një prej shteteve të rajonit tonë, Republikën e Kosovës”.
“Historia e Kombeve të Bashkuara është historia e një zgjerimi të pandërprerë. Nisi me 50 anëtarë në San Françisko dhe jemi tashmë 193 të tillë. Megjithatë sërish kjo Asamble e madhe nuk është e nuk do të jetë e plotë pa një prej shteteve të rajonit tonë, Republikën e Kosovës.
Më keni dëgjuar më shumë sesa njëherë këtu të bëj thirrje për njohjen e pavarësisë së Kosovës, nuk është obsesion e as diçka thjesht sa për ta thënë për kauzën. Është ftesë për të njohur realitetet e reja në zemër të Europës, në Ballkanin Perëndimor, ku një shtet i ri lindi me ndihmën e bashkësisë ndërkombëtare, e angazhuar për kauzën e lirisë e të drejtave të njeriut dhe të vetëvendosjes.
Por kjo punë duhet të përfundohet dhe dua ta theksoj, ta përsëris këtë thirrje dhe e bëj këtë sepse realiteti na ka treguar ne kosovarëve, serbëve, të gjithë ballkanasve, europianëve dhe kujtdo, kudo që ndodhet që do ta shohë se një Kosovë e pavarur, sovrane, është një realitet që vazhdon prej 13 vjetësh e ka sjellë më shumë paqe e stabilitet në rajon, ka kontribuar që të shkëputemi nga e shkuara e hidhur dhe në mënyrë të pamohueshme është pjesë e së ardhmes së përbashkët të Ballkanit Përendimor”, tha Rama.
Të njëjtin mesazh, ai ia përcolli dhe Serbisë.
“Shqipëria mbështet si alternativë të vetme dialogun midis Kosovës dhe Serbisë që do të sjellë njohjen e ndërsjellë midis dy shteteve, dy fqinjëve.
Çdo ditë pa një marrëveshje të tillë është një ditë e humbur, një ditë që u vidhet të rinjve në të dyja vendet, një ditë që i hiqet të ardhmes së përbashkët.
Dhe e them miqësisht, por me bindje absolute, vetëm maturia, kurajoja dhe vizioni do ta lejojë më në fund Serbinë të heqë barrën e së shkuarës”, theksoi i pari i qeverisë shqiptare. /tesheshi.com/
