Futbolli është si jeta, sot mund të jesh në majë, një ditë më pas fati të shemb papritmas përdhe. Kështu i ka ngjarë Barcelonës mbrëmjen e makthshme të së martës.
Katalanasit kishin zhvilluar një sezon të jashtëzakonshëm gjer tani. Të parët në La Liga, ende pa asnjë humbje, thuajse kampionë, e po ashtu në finalen e Kupës së Mbretit, në pritje për ta luajtur dhe atë. Në Champions League kishin patur një short të mirë në çerekfinale; Roma dukej krejt e kapërcyeshme.
Por katalanasit ishin të pavetëdijshëm për faktin se nga kryeqyteti italian do u vinte e keqja. Aq më tepër kur ndeshjen e parë e fituan 4-1, aq më tepër kur i tërë opinioni sportiv e quante kualifikimin e tyre diçka të mbaruar.
Për të ardhur te rrënimi historik i 10 prillit: humbje 3-0 në “Olimpico”, në ndeshjen më të keqe sezonale të Barcelonës! I treti eliminim në çerekfinale në tre sezone radhazi në Champions League!
Një vit më parë katalanasit eliminonin PSG-në në një të tetat e të njëjtit aktivitet pas një përmbysjeje historike, dhe tani janë të detyruar ta përjetojnë vetë të njëjtën ndjesi shkatërruese.
E tërë historia ka një ironi dërrmuese për Barcelonën e Messi-t, Suarez-it, Iniesta-s, Pique-së…. Në muajt e parë të këtij sezoni, Barcelona shkëlqente, ndërsa rivali i saj i përhershëm, Reali i Madridit, ishte në krizë të thellë. Atëherë bëhej pyetja në kishte marrë fundi cikli i Realit të Ronaldo-s. Dhe pikërisht kur nuk pritej, pyetja nis të bëhet për Barcelonën e Messi-t. Fundi i një perandorie? Reali ka lënë ferrin për të provuar parajsën, me Ronaldo-n të rizgjuar fuqishëm, me një këmbë në gjysmëfinale të Champions League-s, Barcelona ka bërë ndaj Romës të kundërtën, duke kaluar nga parajsa në ferr.
Analiza e ndeshjes në “Olimpico” dhe vlen, por dhe nuk vlen. Humbja katastrofike e Barcelonës meriton të shihet më mirë si një tekë e futbollit. Këtu qëndron bukuria e këtij sporti: herë pas here është tekanjoz! Këtë herë e pësoi Barcelona! /tesheshi.com/
