Me zgjedhjet presidenciale të së dielës ka marrë fund dhe presidenca 12-vjeçare e të majtëve. Mauricio Macri është fituesi i këtyre zgjedhjeve, duke siguruar 51.5% të votave karshi 48.5% të kundërshtarit të tij, Daniel Scioli-t.
Fitorja e tij nënkupton dhe fundin e epokës së familjes Kirchner në krye të vendit, me të ndjerin Nestor Kirchner si president në vitet 2003-2007, të pasuar deri sot nga e shoqja, Cristina Fernandez de Kirchner.
“Kjo është një ditë historike” u shpreh fituesi i lumturuar, pasi bëri çudinë duke ngadhënjyer në raundin e dytë të votimeve.
Mauricio Macri vjen nga shtresa e pasur argjentinase, si i biri i një prej njerëzve më të pasur të vendit. Karriera e tij politike është paraprirë nga një angazhim i gjatë me biznes. Macri do të zgjidhej në vitin 1995 presidenti i klubit të futbollit Boca Juniors, për t’u rizgjedhur sërish katër dhe tetë vite më vonë. Klubi do të përjetonte gjatë presidencës së tij një prej periudhave më të suksesshme të historisë së vet. /tesheshi.com/
