Afro 91.2 përqind e votuesve maqedonas i thanë “Po” marrëveshjes me Greqinë për emrin e ri, në referendumin e së dielës; por kjo mund të konsiderohet një “fitore si e Piros”, pasi referendum dështoi në aspekt të pjesëmarrjes, më pak se 40 përqind, që ishte dhe pjesë e apelit të fuqishëm të faktorit ndërkombëtar. Dhe pra, karta ofertuese me anëtarësim në NATO e BE, nuk ka funksionuar përballë nacionalizmit maqedonas.
Megjithatë, kryeministrat Zaev dhe Tsipras, thanë se do të vazhdojë të avokojnë për një marrëveshje mbi ndryshimin e emrit të Maqedonisë
Megjithëse referendumi nuk është ligjërisht i detyrueshëm, një numër i mjaftueshëm parlamentarësh thanë se do t’i përmbahen rezultateve të saj. Tashmë, si radhë pune, do të duhet një shumicë prej dy të tretash në parlament si e nevojshme për të ndryshuar emrin. “Më shumë se 90 për qind e qytetarëve miratuan një marrëveshje me Greqinë për ndryshimin e emrit të Maqedonisë dhe parlamenti duhet të konfirmojë vullnetin e shumicës”, tha Zaev. “Më shumë se 90 për qind votuan në favor, prandaj tani është në parlament që të konfirmojë vullnetin e shumicës”, theksoi ai.
Megjithatë, ai nuk ka përmendur se një komision zgjedhor ka njoftuar se dy të tretat e votuesve nuk kanë shkuar në votime përpara mbylljes së sondazheve.
Ai tha se shpresonte që deputetët e opozitës (VMRO-DPMNE) të “respektonin vullnetin demokratik të qytetarëve” dhe të ratifikonin një marrëveshje në parlament. Përndryshe, tha ai, ai do të thërriste “zgjedhje të parakohshme parlamentare”.
Ndërsa Tsipras shprehu mbështetjen për Zaev në zbatimin e marrëveshjen së Prespës arritur në qershor, ku u vendos për emrin e ri. Në një bisedë telefonike, Tsipras përshëndeti “vendosmërinë dhe guximin” e kolegut të tij për të vazhduar më tej. Edhe Ministria e Jashtme greke njoftoi se vendi mbetet i angazhuar për zbatimin e marrëveshjejes me Maqedoninë.
Megjithatë, Ministri grek i Mbrojtjes, Pavlos Kamenos, i cili kundërshton marrëveshjen e ndryshimit të emrit, mirëpriti pjesëmarrjen e ulët. “Kur thashë se referendumi do të shembet, ata më kritikuan. Tani, 68 përqind e kombit e deklaruan këtë marrëveshje si të pavlefshme”, tha Kamenos.
Nga ana tjetër, nga Brukeli nuk është përçuar ndonjë entuziazëm. “Unë uroj qytetarët që votuan në referendum dhe përdorën liritë e tyre demokratike”, shkroi Komisioneri Hahn në Twitter.
Dhe, duke vënë në dukje pjesëmarrjen e ulët, Hahn kërkoi që “të gjithë udhëheqësit politikë të respektojnë këtë vendim”.
Ndërkohë, përkrahësit e bojkotit të referendumit, i cili u organizua në rrjetet sociale, u mblodhën gjatë mbrëmjes jashtë ndërtesës së parlamentit maqedonas..
“Ne nuk kemi problem me emrin, ne kemi një problem me atë që dikush na e imponon atë”, tha Ana Mijakovska, një profesore 47-vjeçare e filozofisë, një mbështetëse e bojkotit. Thirrja për bojkot u mbështet nga presidenti Gjeorgje Ivanov. /tesheshi.com/
