Lulzim Basha ka arritur një fitore të vogël por shumë të rëndësishme dhe simbolike në këto ditë të vështira për të, ku ish-drejtuesit e PD-së po bëhen gati ta nxjerrin me forcë nga selia.
Pas gjashtë vitesh Kavaja i rikthehet Partisë Demokratike, duke rimarrë bastionin që ua hoqi nga dora Elvis Rroshi në vitin 2011.
Fitorja në Kavajë duket i dha pak oksigjen në intensitetin e tmerrshëm të azotit që u çlirua nga ajri i ndenjur i Partisë Demokratike prej më shumë se 25 vitesh, të cilin Lulzim Basha kujtoi se e kishte derdhur në atmosferë.
Por ai “gaz” i dëmshëm për të ndodhej thjesht i magazinuar diku në hapësirat e selisë së re të PD-së që si akronim jo aq pezhorativ mban emrin SHQUP, pasi e tillë ka qenë qysh kur u krijua.
Krejt papritur, në orët e para të mëngjesit, kandidati i PD-së, Isa Sakja ka arritur të fitojë me 26 vota diferencë ndaj rivalit socialist.
Lulzim Basha nuk ka humbur asnjë moment për të komentuar këtë fitore.
““Lajm i mrekullueshem nga Kryeqyteti i Lirisë dhe Demokracisë: Isa Sakja u zgjodh Kryetari i ri i Bashkise se Kavajës!
Urimet e mija më të përzemërta qytetarëve të Kavajës për këtë ngadhnjim mbi krimin, korrupsionin dhe terrorin e bandave!
Mirënjohje të thellë demokratëve të Kavajës dhe Kryetarit Sakja për këtë fitore ogurbardhë!
Nga Kavaja heroike e qëndresës, përballjes dhe fitores do të nisë ringritja e Shqipërisë.
Zoti e bekoftë Kavajën e Lirisë dhe Demokracisë!”, shkruan Bashan në faqen e tij zyrtare në Facebook.
Duket pak e çuditshme kjo fitore e PD-së në bashkinë e Kavajës, pasi në të njëjtin territor për votimet parlamentare ka fituar PS-ja, por me rezultat të ngushtë.
Saktësisht: 10.215 vota mori PS-ja, ndërsa 9.321 mori Partia Demokratike. LSI arriti të marrë 3173 vota.
Ndërkaq për bashkinë, Isa Sakja i PD-së mori 11155 vota, ndërsa Dorjan Murati i PS-së mori 11127 vota. Maksim Kona i LSI-së mori më pak sesa partia e tij në zgjedhjet parlamentare; vëtëm 1969 vota.
Megjithatë, kjo diferencë në dy votimet rastisi edhe me një sjellje jo luftarake të PS-së në Kavajë, ku një numër i madh fletësh votimi dolën të pavlefshme apo ishin hedhur në kutinë e parlamentit.
Edi Rama kishte urdhëruar që të mos bëhet asnjë tentativë për tënsion dhe acarime.
Një nga komisionerët socialistë në Kavajë, i cili është një nga aktivistët e vjetër të kësaj partie në qytetin e rëndësishëm të Shqipërisë së mesme, i tha tesheshi.com se përveç aspektit të votave të pavlefshme që ishin shumë dhe gabimeve teknike, ku shumë votues kryesisht të moshuar i hodhën votat për kreun e bashkisë në kutinë për Parlamentin, edhe kandidati i PD-së, Isa Sakja ishte një zgjedhje mjaft e zgjuar e Lulzim Bashës, pasi ai gëzon një reputacion të mirë në qytet dhe përfaqëson një familje me vlera qytetare në komunitetin e Kavajës.
Natyrisht faktor është edhe largimi i Elvis Rroshit, i cili u përfshi pak në fushatë, i cili siç kishte fuqi për të tërhequr vota, ka pasur edhe ndikim negativ pasi formimi i tij jo intelektual ka ndikuar në një pjesë të votuesve që kërkonin një cilësi të re për bashkinë.
Por gjithsesi vlera e votimeve të Kavajës është vetëm politike.
Normalisht Edi Rama ka korrur fitoren më të madhe politike në historinë e tij të garimit që nga viti 2000. Ka arritur të mposhtë të gjithë elitën politike që e ka pasur kundër për 25 vjet me radhë.
Ramës nuk i leverdiste të krijonte një incident për vetëm një bashki dhe të krijonte kosto për një fitore që është realisht shumë, po shumë e çmuar për kryeministrin aktual.
Siç duket, Edi Rama ka ndjekur dhe maksimën e Makiavelit: “Fitorja më e rëndësishëm në një betejë është armatosja e kundërshtarit që sapo ke mundur”!
Një Lulzim Bashë i rrëzuar përtokë do t’ja bënte fitoren Edi Ramës ekzaktësisht si të Pirros së Epirit që ka mbetur tashmë si postulat në literaturën bazike të shkollës së lidershipit në gjithë universitetet e botës.
Pirro, mbreti i Epirit, në vitin 279 përpara Epokës së Re, u përball me romakët në Puglia-Itali dhe fitoi.
Por kjo fitore i kushtoi aq shumë kosto monarkut të Epirit sa e dërrmoi dhe pas asaj fitoreje, jo vetëm Pirro ra nga froni, por u shkatërrua totalisht dhe shteti që kishte ngritur me aq mund.
Ndaj që prej antikitetit, një fitore me kosto quhet “si e Pirros” dhe shërben si një forcë e shembullit që nuk ka rëndësi thjesht ngadhënjimi, por pasojat që sjell ai.
Ndaj edhe Edi Ramës, fitorja e arritur më 25 qershor, ku mori mandatin për të qeverisur i vetëm nuk do t’i vlejë fare nëse ai nuk do të ketë disponibilitetin e Lulzim Bashës për të vazhduar marrëveshjen e 18 majit.
Ndaj Rama e falënderoi publikisht kreun e opozitës në mitingun e fitores.
Nuk mund të ecë përpara mazhoranca 74 mandatëshe e Ramës nëse nuk çon përpara reformën në drejtësi, që arrihet me të paktën 10 vota më shumë. Por më shumë se vota i duhet vullnet dhe armëpushim nga opozita.
Lajme të mira vijnë për Ramën me kandidimin e Eduard Selamit që është mbështetës i flaktë i reformës në drejtësi, por ish-kryetari nuk i ka aksionet aq të mira brenda militancës blu.
Ndaj investimi për të ruajtur Lulzim Bashën është për Edi Ramën po aq i rëndësishëm sa ai për të fituar zgjedhjet parlamentare.
Kush ka tentuar të poshtërojë kundërshtarin vetëm i ka zvogëluar ditët vetes. A nuk ndodhi kështu me Berishën në vitin 2009, kur tentoi të shkatërrojë Ramën dhe u largua nga politika jo me lavdinë apo koston që do të donte? Historia nuk është vetëm leksion, por një precedent i thyer në aksiomë!
/tesheshi.com/
