Presidenti turk Rexhep Tajjip Erdogan dhe kryeministri Binali Jëlldërëm e çmuan fort rezultatin e zgjedhjeve në referendumin e së dielës, duke e përcjellë këtë përmes fjalës së tyre para qytetarëve turq apo gazetarëve në konferencë shtypi.
“16 prilli është një fitore për të gjithë Turqinë,” deklaroi Erdogani në komunikimin me gazetarët pak orë pas suksesit në referendum.
“Sot Turqia ka marrë një vendim historik mbi sistemin qeverisës, që ka qenë temë debati për 200 vite. Ky ndryshim kushtetues nuk është një i tillë i zakonshëm. Ky është një ndryshim shumë domethënëse,” u shpreh ai.
“Turqia e ndryshoi sistemin qeverisës me anë të mjeteve civile për herë të parë në historinë e republikës. Kjo është shumë e rëndësishme në këtë kuptim.”
“Do të doja t’i falënderoja të gjithë qytetarët, pavarësisht si votuan, që shkuan në qendrat e votimit për të mbrojtur vullnetin kombëtar,” nënvizoi presidenti turk.
E njëjta frymë e përshkoi dhe fjalën e kryeministrit turk, Binali Jëlldërëm, para masës së madhe të njerëzve të mbledhur në selinë qendrore të AKP-së, partisë në pushtet në Turqi.
“U shpreh vlerësimin tim të gjithë qytetarëve që kanë votuar për ‘po’-në dhe ‘jo’-në. I përshëndes të tërë me dashuri dhe simpati.”
“Nuk ka të humbur në këtë referendum. Turqia është fituese, kombi ynë i dashur është fitues,” u tha Jëlldërëm mbështetësve të AKP-së dhe të referendumit.
“Ky vend, ky komb, ka treguar edhe një herë se nuk ka për t’u gunjëzuar kurrë para asnjë tutele apo ndërhyrjeje të jashtme. Populli ynë u ka dhënë përgjigjen më të mirë me këto zgjedhje forcave të jashtme që janë armiqësore ndaj Turqisë, organizatës terroriste separatiste dhe organizatës terroriste që ndërmori përpjekjen për grusht shteti më 15 korrik,” shtoi kryeministri në fjalën e tij.
Referendumi i së dielës i jep fund me sukses një përpjekjeje të gjatë të AKP-së, Partisë për Drejtësi dhe Zhvillim, dhe posaçërisht të presidentit Erdogan, për të bërë ndryshime kushtetuese që do t’i garantonin vendit më stabilitet dhe zhvillim më të qëndrueshëm. Me sistemin e ri qeverisës synohet të mbyllet njëherë e mirë periudha e krizave politike, e qeverive të koalicionit, e puçeve. /tesheshi.com/
