Kosova mund të bëhet anëtarja më e re e UEFA-s në muajin mars të vitit të ardhshëm. Komiteti Ekzekutiv i UEFA-s, në mbledhjen e mbajtur në Maltë, ka diskutuar për çështjen e Kosovës dhe ka vendosur që kërkesën e FFK-së për anëtarësim ta dërgojë në axhendën e kongresit. Një lajm të tillë e ka konfirmuar UEFA nëpërmjet një njoftimi për media pas përfundimit të mbledhjes së KE të UEFA-s.
Ky lajm është mirëpritur nga kreu i Federatës së Futbollit të Kosovës, Fadil Vokrri që e ka quajtur një fitore të radhës, por që nga vlera del të jetë ajo më e madhja.
“Është fitore e madhe, sepse ky vendim e tejkalon nenin që na pengonte dhe tani kërkesa jonë shkon direkt në votim”, theksoi Vokrri.
Për pranim në UEFA, Kosovës i duhen 2/3 e votave. Vokrri e mbështet optimizmin e tij tek shtetet që e kanë njohur Kosovën.
“Ne na kanë njohur 37 shtete të Evropës nga gjithsej 54, që do të thotë më shumë se 2/3”, nënvizoi ai, duke analizuar gjasat e pranimit të Kosovës.
Kongresi i ardhshëm i UEFA-s mbahet në mars të vitit 2016 në Budapest të Hungarisë, por, sipas Vokrrit ka gjasa që ai të shtyhet për dy muaj. Sidoqoftë, pranimi i FFK-së në UEFA pritet të ndodhë vitin e ardhshëm. /tesheshi.com/
