Për Juventusin ka ardhur të dielën në mbrëmje humbja e katërt në kampionatin italian, dhe pikërisht në “Artemio Franchi” të Firences. Aty ku Fiorentina nuk fitonte që nga viti 2013 ndaj torinezëve.
Fitorja 2-1 e Fiorentinës ka rihapur Serinë A, me Juventusin kryesues që ka pas, me vetëm një pikë më pak, Romën. E po ashtu Napolin, diçka më larg. E vetmja qetësi për Juventusin vjen nga fakti se ka një ndeshje më pak të zhvilluar, fitimi i së cilës mund ta çojë në katër pikë diferencën me kundërshtarët.
Përndyshe, Paulo Sousa, trajneri i Fiorentinës, është shprehur mjaft i entuziazmuar pas fitores: “Ekipi e interpretoi mirë ndeshjen, në mbrojtje dhe në sulm, kësisoj ne e fituam me meritë atë.”
“Nëse luajmë me këtë dëshirë, vendosmëri dhe intensitet, do të jetë e vështirë për çdokënd që të na mundë,” ka thënë portugezi, një njohës i mirë i futbollit italian, ku dhe ka luajtur në të shkuarën, gjatë karrierës si futbollist.
“Misioni im është të fitoj. Unë dua të fitoj, edhe ndaj skuadrave që në letër janë më të forta se ne. Çdo fitore na ndihmon t’i afrohemi një suksesi më të madh.” /tesheshi.com/
