Ka qenë koinçidencë që dy ditë pas fitores prej Erdoganit të zgjedhjeve në Turqi, ku konstitucionalisht vendi kalon nga republikë parlamentare në presidenciale, siç në sistemin amerikan, BE-së i ka takuar të shprehet lidhur me të ardhmen e raporteve me Ankaranë përsa i përket çështjes së anëtarësimit të Turqisë në Union.
Siç mund të pritej, konkluzioni ka qenë negativ.
Këshilli i Ministrave konkludoi se Turqia po largohet gjithnjë e më shumë nga Bashkimi Europian dhe negociatat për pranimin u cilësuan “të mbetura në një qorrsokak”.
Në një dokument hartuar nga ministrat, vlerësohen përpjekjet e Turqisë në pritjen e më shumë se 3.5 milionë refugjatëve në territorin e saj, por më pas renditen ankesat në lidhje me ato që BE i konsideron shkelje standartesh në gjykimin për ish-grushtin e dështuar të shtetit në korrik të 2016-ës.
Në atë kohë, Brukseli nuk reagoi për ta dënuar përpjekjen për grusht shteti, por nuk e bëri të njëjtën gjë kur nisën masat ndëshkimore nga Ankaraja kundrejt organizatorëve. Kjo çoi në një ftohje dhe krizë marrëdhëniesh me Brukselin.
Edhe fitorja e fundit e Erdoganit, është pasuar me një përshëndetje të shkurtër e të ftohtë, formuluar nga dyshja Juncker-Tusk.
“Turqia është një vend kandidat dhe një partner kyç i BE-së. Ne shohim përpara perspektivën për të punuar ngushtë me ju për tema me interes të përbashkët si siguria, emigrimi dhe energjia”, janë shprehur dy diplomatët e lartë europianë në mesazhin e tyre drejtuar presidentit turk. /tesheshi.com/
