Partia qeverisëse e Kosovës Vetëvendosje, e udhëhequr nga kryeministri Albin Kurti, është në rrugën e duhur për të fituar zgjedhjet parlamentare, por jo mjaftueshëm për të formuar një qeveri më vete.
Lëvizja Vetëvendosje po prin me 41.10 për qind të votave, të dhënat e Komisionit Qendror të Zgjedhjeve janë përditësuar mëngjesin e së hënës pas numërimit të 89.26 për qind të votave, raportojnë mediat e Prishtinës. Janë ezauruar 2244 vendvotime nga gjithsej 2533.
Në vend të dytë është Partia Demokratike e Kosovës (PDK) me 22.19 për qind, e ndjekur nga Lidhja Demokratike e Kosovës (LDK) (17.62 për qind) dhe Aleanca për Ardhmërinë e Kosovës (AAK) (7.61 për qind).
Lista serbe, të dhjetë mandatet
Lista Serbe, partia më e madhe serbe e Kosovës e mbështetur nga Beogradi zyrtar dhe një parti motër e SNS-së në pushtet në Serbi, fitoi 4.2 për qind të votave dhe, sipas drejtuesve të saj, do të fitojë të dhjetë vendet në parlament të garantuara për komunitetin serb.
Nga 120 ulëse në Kuvendin e Kosovës, 20 u takojnë pakicave – dhjetë serbëve dhe dhjetë komuniteteve tjera pakicë.
Të drejtën e votës kishin pak më shumë se dy milionë qytetarë dhe 40.51 për qind e tyre dolën në votim. Në zgjedhjet e katër viteve më parë, pjesëmarrja ishte 46.9 për qind.
Kurti erdhi në pushtet në vitin 2021 kur një koalicion i udhëhequr nga Vetëvendosje fitoi më shumë se 50 për qind të votave.
Kurti njoftoi të dielën në mbrëmje se partia e tij do të formojë sërish qeveri, por kësaj radhe i duhet të paktën edhe një parti për të pasur sukses.
Ndaj, duket se fitorja i ngjan asaj të Piros, nga lashtësia, edhe me humbje brenda. /tesheshi.com/
