Interi i Milanos e ka gjetur më në fund rrugën e fitores ndaj Juventusit në kampionatin italian, të cilin nuk e mposhtte që prej vitit 2010.
Një fitore e shkëlqyer, pas një loje mjaft të mirë të interistëve, të shndërruar prej asaj humbjeje të shëmtuar në mesjavë në Ligën e Europës.
Rezultati përfundimtar i ndeshjes më të rëndësishme të Serisë A për javën e katërt është 2-1.
Në “Giuseppe Meazza” kanë qenë vendasit më këmbëngulës që nga minuta e parë, ndërkohë që Juventusi vinte pas tre fitoreve në tre javë.
Trajneri i Juventusit, Allegri, e kishte lënë në stol Higuain-in, por do të humbiste dhe Benatia-n në minutën e 25-të, i cili u dëmtua.
Te Interi është Icardi ai që si gjithmonë i jep ritëm lojës dhe ngacmon portën kundërshtare. Pavarësisht rasteve të pjesës së parë, golat do të vinin në pjesën e dytë.
Në momentin më të mirë të Interit do të shënonte Juventusi. Minuta e 66-të, dhe Lichtsteiner nuk e ka të vështirë t’i kalojë miqtë në epërsi pas atij krosimi të saktë para zonës së portierit.
Jo të shkurajuar, interistët rikthehen të sulmojnë, dhe dy minuta më pas Icardi vendos barazpeshën. Një kërcim i fuqishëm i tij me kokë, dhe topi përfundon në rrjetë: 1-1!
Për të ardhur te minuta e 78-të, kur po Icardi jep një krosim mjeshtëror, dhe Perisiç e çon topin po kaq mjeshtërisht me kokë në qoshen e majtë të Buffon-it.
Epërsia 2-1 e Interit nuk do të ndryshonte më, pavarësisht nga prania e argjentinasit Higuain në fushë, apo minutave të shtuara.
Një fitore që rikthen Interin te futbolli i niveleve të larta, duke lënë pas një krizë të vogël të fillimsezonit. Për Juventusin nuk ndryshon asgjë: është thjesht një humbje.
I fituar është dhe kampionati italian, që bëhet më i bukur tani. /tesheshi.com/
